Шавкат Мирзиёев 5 февраль куни давлат ташрифи билан Исломободга келди. Бу ҳақда Президент матбуот хизмати хабар берди.
Покистон ҳаво ҳудудида олий мартабали меҳмоннинг самолётига ушбу мамлакат Ҳарбий ҳаво кучларининг қирувчи учоқлари ҳамроҳлик қилди.
“Нурхон” аэропортида давлат раҳбарини Покистон президенти Асиф Али Зардорий, бош вазир Шаҳбоз Шариф ва бошқа расмий шахслар кутиб олди. Икки мамлакатнинг давлат байроқлари кўтарилди, фахрий қоровул саф тортди.
Дастурга мувофиқ, бугун Мудофаа кучлари Олий бош қўмондони — Қуролли Кучларнинг қуруқликдаги қўшинлар қўмондони, фельдмаршал Асим Мунир, Покистон бош вазири Шаҳбоз Шариф билан музокаралар ва Олий даражадаги стратегик ҳамкорлик кенгашининг биринчи йиғилиши бўлиб ўтади.
Эртага, 6 февраль куни Покистон президенти Асиф Али Зардорий билан учрашув ва Ўзбекистон—Покистон бизнес форумида иштирок этиш режалаштирилган.
