Исроил бош вазири Биньямин Нетаньяху унинг мамлакати Ғазо секторида Фаластин давлати қурилишига йўл қўймаслигини таъкидлади. У бу ҳақда The Times of Israel нашрига берган интервьюсида маълум қилди.
У минтақани қайта тиклаш ҲАМАС гуруҳи тўлиқ қуролсизлантирилиб, демилитаризация қилинмагунча бошланмаслигини айтди. Нетаньяху Исроил Иордан дарёсидан Ўрта Ер денгизигача бўлган бутун ҳудуд, жумладан, Ғазо сектори устидан назоратни сақлаб қолиш ниятида эканини таъкидлади.
Нетаньяхунинг таъкидлашича, 26 январь куни Ғазодаги исроиллик гаровга олинган охирги шахс — 24 ёшли Рана Гвилининг жасади қайтарилганидан сўнг, эътибор ҲАМАС қуролларини йўқ қилиш ва Ғазо секторини демилитаризация қилишга қаратилади. У ҲАМАС фойдаланган туннеллар ҳам йўқ қилинишини айтди. Нетаньяху бу мақсадга оддий ёки мураккаб йўл билан эришилиши, муҳими у “ҳар қандай ҳолатда ҳам” амалга ошишини билдирди.“Мен Ғазони демилитаризация қилмасдан туриб қайта тиклашга рухсат берамиз, деган гапларни эшитяпман — бундай бўлмайди. Ғазога Туркия ва Қатар аскарларини жойлаштирмоқчимиз, деган фикрларни ҳам эшитяпман. Бу ҳам бўлмайди. Ғазода Фаластин давлати тузилишига рухсат бераман, дейилган гаплар ҳам бор. Бундай бўлмаган ва бўлмайди ҳам”, деди Исроил бош вазири.
Рафаҳ чегараси очилади
Нетаньяху Ғазо ва Миср ўртасидаги Рафаҳ чегара ўтиш пункти яқин кунларда қайта очилишини айтди. Бироқ мазкур пункт орқали Ғазога кирадиган пиёдалар сони кунига 50 киши билан чекланиши мумкинлигини таъкидлади.
Рафаҳ ўтиш пунктини очиш масаласи Исроил томонидан Дональд Трампнинг Ғазо бўйича 20 банддан иборат режаси доирасида маъқулланган. Бироқ бу ҲАМАС режанинг биринчи босқичидаги мажбуриятларини бажариши шарти билан боғлиқ бўлган ва бу шарт Гвили қайтарилгач бажарилди.“Биз ҳеч кимнинг чиқиб кетишига тўсқинлик қилмаймиз. Бу ер товарлар учун очилмайди. Одамлар чиқади, одамлар киради — бироқ уларнинг барчаси (Исроил томонидан) жуда синчковлик билан текширилади”, деди у.
Ғазода ўт очишни тўхтатиш бўйича Трампнинг тинчлик режаси
Исроил ва ҲАМАС 2025 йил октябрь ойида АҚШ президенти Дональд Трамп маъмурияти томонидан ишлаб чиқилган тинчлик режаси доирасида ўт очишни тўхтатишга келишиб олди. Томонлар келишувга амал қилиши учун АҚШ, Туркия, Қатар ва Миср кафиллик қилган.
Режанинг биринчи босқичи доирасида ҲАМАС тирик қолган барча исроиллик гаровдагиларни озод этди, бунинг эвазига Исроил қамоқларидан фаластинлик маҳбуслар қўйиб юборилди. Оқ уй январь ойи ўрталарида Ғазодаги ҳарбий ҳаракатларни якунлашга қаратилган Трамп режасининг иккинчи босқичи бошланганини эълон қилди.
Ушбу босқич доирасида “Тинчлик кенгаши” ва унга бўйсунувчи Миллий қўмита тузилиши режалаштирилган. Мазкур тузилмалар ҳудудни бошқаришни вақтинча ўз зиммасига олади, кейинчалик бу вазифани Фаластин миллий маъмурияти бажариши кутилмоқда.
