AFP агентлигининг Исроил расмийсига таяниб хабар беришича, Бенжамин Нетаньяху 29 декабрь, душанба куни Қўшма Штатларнинг Флорида штатида бўлиб, Дональд Трамп билан учрашади. Бу Исроил бош вазирининг Оқ уй раҳбари билан учрашиш учун йил бошидан буён АҚШга қилган бешинчи сафари ҳисобланади.
Бенямин Нетаньяху ҳамда Дональд Трампнинг учрашуви Ғазо секторида ўт очишни тўхтатиш бўйича битимнинг иккинчи босқичига ўтиш учун ҳаракатлар бораётган бир вақтда тўғри келмоқда. Исроил бош вазирининг Қўшма Штатларга келиши ҳақида аввалроқ Оқ уй раҳбари журналистларга маълум қилганди.
Едиотҳ Аҳронотҳ нашрига кўра, учрашувда Эрон, Сурия билан музокаралар, “Ҳизбуллоҳ”, шунингдек Ғазо тинчлик битимининг кейинги босқичлари муҳокама қилиниши кутилмоқда.“У мени кўришни истаяпти. Ҳозирча расмий келишув йўқ, аммо учрашишни хоҳлайди”, деган Трамп Мар-а-Лаго қароргоҳига жўнаб кетишидан олдин.
Омонат тинчлик
АҚШ воситачилиги билан октябрь ойида имзоланган келишув икки йилдан буён интенсив жанглар бораётган Ғазога тинчлик олиб келди. Аммо сулҳ ҳозирча жуда мўрт бўлиб, томонлар битимнинг иккинчи босқичини бошлаши лозим. Аммо жараён жуда секин бормоқда. Қолаверса Исроил, оташкесимга қарамай, сулҳ шартларини бузиб, 400 га яқин фаластинликнинг ҳаётига зомин бўлди.
Мазкур келишувнинг иккинчи босқичига мувофиқ ҲАМАС қуролларини топшириши, Исроил қўшинлари Ғазодан олиб чиқиши ҳамда анклавга тартибни сақлаш учун халқаро контингент жойлаштирилиши керак бўлади. Axios нашрининг ёзишича, Трамп ва Нетаньяху учрашуви сулҳнинг кейинги босқичларига ўтиш учун ҳал қилувчи рол ўйнайди.
Нашрнинг Оқ уй расмийларига таяниб маълум қилишича, Трамп маъмурияти Ғазода имкон қадар тезроқ технократ ҳукумат тузишни ва анклавга халқаро кучларни жойлаштиришни хоҳлайди. Манбага кўра, АҚШ президентининг юқори мартабали маслаҳатчилари Нетаньяху омонат сулҳни хавфга қўювчи қадамлар қўяётганидан ва тинчлик жараёнини секинлаштираётганидан норозилик билдиряпти.
