Мадриднинг “Реал” клуби вингери Родриго Гоэс Испания Суперкубоги финалидан ўрин олган “Барселона”га қарши майдонга туша олмаслиги мумкин. Бу ҳақда Madrid Universal нашри хабар бермоқда. Шунингдек, Антонио Рюдигернинг ҳам “Эл-Класико”да иштирок этиши сўроқ остида.
Манбага кўра, бразилиялик футболчининг сон мушакларида муаммо юзага келган. Бугун, 10 январь куни Родриго тиббий кўрикдан ўтади. Тиббий кўрик натижаларига кўра, футболчининг финал баҳсида иштирок этиши ёки этмаслиги аниқ бўлади. Шунингдек, Рюдигернинг ҳам финалда иштирок этиши ҳақидаги савол очиқ қолмоқда. У ярим финал олдидан ҳам ноқулайлик ҳис қилганига қарамай, майдонга тушишга қарор қилган эди.
Шу билан бирга Килиан Мбаппе “Эл-Класико”да қатнашиши мумкин. Франциялик футболчи ярим финалдан ўрин олган “Атлетико”га қарши баҳсни ўтказиб юборди. Аммо ҳужумчи финал олдидан Жиддага етиб келди. Унинг финал учрашувини асосий таркибда бошлаши ёки бошламаслиги бўйича қарор бугун, 10 январь куни қабул қилинади.
Маълумот ўрнида, Испания Суперкубоги финал учрашуви “Барселона” ва “Реал” ўртасида бўлиб ўтади. Учрашув 11 январь куни Тошкент вақти билан 23:00 да бошланади. Турнирнинг ярим финал босқичида “Реал” Мадриднинг “Атлетико” клубини мағлуб этган бўлса, “Барселона” Бильбаонинг “Атлетик” жамоасидан устун келганди.
