Мадриднинг “Реал” клуби президенти Флорентино Перес “Барселона” ярим ҳимоячиси Педрини трансфер қилиш орқали 2000 йилда ҳужумчи Луис Фигунинг каталонияликлар сафидан “қироллик клуби”га ўтиши билан боғлиқ тарихни такрорлашни кўзламоқда. “Реал” раҳбари 23 ёшли футболчини 2027 йилгача Мадрид клубига олиб келишни режалаштирмоқда. Бу ҳақда El Desmarque нашри хабар берди.
Манбага кўра, Перес бу трансфер орқали таркибни кучайтиришдан кўра, “Барселона”нинг муҳим футболчиларидан бирини сотиб олиб, рақибни заифлаштиришни кўзламоқда.
Журналист Сиро Лопеснинг таъкидлашича, Педрининг “Реал”га ўтиши деярли имконсиз. Сабаби футболчининг “Барселона” билан тузилган шартномаси 2030 йилгача амал қилади ва унинг товон пули 1 миллиард еврони ташкил этади. Қолаверса, ярим ҳимоячи ўзини каталониялик клубнинг ажралмас қисми сифатида ҳис қилади ва болалигидан “Барселона” мухлиси ҳисобланади. Шу боис мадридликларга футболчини кўндириш учун жуда кўп ҳаракат қилиши талаб этилади.
Педри 2019 йилдан буён “Барселона” сафида тўп суриб келмоқда. Ушбу давр мобайнида футболчи барча турнирлар доирасида 227 та учрашувда майдонга тушиб, ўз ҳисобига 28 та гол ва 29 та ассист ёздириб қўйган. Transfermarkt портали маълумотларига кўра, футболчининг бозор қиймати 140 миллион еврони ташкил қилади.
