Испания қироллик футбол федерацияси (RFEF) интизомий қўмитаси “Барселона” бош мураббийи Ҳанси-Дитер Фликнинг дисквалификациясига қарши берган апелляциясини рад этди. Бу ҳақда АS нашри хабар бермоқда. Шу боис, Флик Ла Лига 10-туридан ўрин олган “Реал Мадрид”га қарши беллашувда техник зонада бўлмайди.
Германиялик мутахассис 9-тур доирасидаги “Жирона”га (2:1) қарши учрашувида ҳакам қарорларидан норозилик билдиргани учун майдон четидан четлатилган эди. У ҳакам Хесус Хил Мансанога нисбатан қўпол тарзда норозилик билдиргани учун икки марта огоҳлантирилиб, майдондан четлатилган эди.
Энди “Эл-Класико”да жамоага Тьяго Алькантара мураббийлик қилиши кутилмоқда. Алькантара 2024-йилда футболчилик фаолиятини якунлаб, “Барселона” мураббийлар штабига қўшилган эди.
Маълумот учун, ҳозирда “Барселона” Ла Лига жадвалида иккинчи ўринни эгаллаб турибди. Каталонияликлар биринчи ўриндаго “Реал”дан икки очкога ортда қолмоқда. “Эл-Класико” 26 октябрь, якшанба куни Мадридда бўлиб ўтади. Учрашув соат 20:15 да (Ўзбекистон вақти билан) бошланади.
