“Манчестер Сити” “Борнмут” вингери Антуан Семеньо трансферини расман эълон қилди. “Шаҳарликлар” ганалик футболчини 75 миллион евро (65 миллион фунт) эвазига сотиб олган.
Қайд этилишича, “Манчестер Сити” ушбу суммани уч йил давомида тўлашни режалаштирмоқда. Бу орқали Семеньо “Борнмут” тарихидаги энг қиммат сотилган футболчига айланди. Футболчи “шаҳарликлар” билан 2031-йилга қадар амал қиладиган шартнома имзолаган.
Хабарларга кўра, Семеньо “Манчестер Сити”га ўтиш учун Англия Премьер Лигасининг тўрт клубидан тушган таклифни рад этган. Трансферда футболчининг испаниялик мутахассис Хосеп Гвардиола қўл остида ишлаш истаги ҳал қилувчи омил бўлган. Футболчига Англиянинг бошқа жамоалари ҳам, жумладан, “Тоттенҳэм”, “Ливерпуль”, “Челси” ва “Манчестер Юнайтед” ҳам қизиқиш билдиргани ҳақида хабарлар тарқалган эди. Аммо якунда “Манчестер Сити” футболчи билан келишувга эришди.
Жорий мавсум 25 ёшли Антуан Семеньо АПЛ доирасида жами 19 та учрашувда майдонга тушиб, ўз ҳисобига 9 та гол ва 3 та голли узатма ёздириб қўйган. Transfermarkt портали футболчининг қийматини 55 миллион еврога баҳоламоқда.
