Англиянинг “Манчестер Сити” клуби “Борнмут” вингери Антуан Семеньонинг трансферини муваффақиятли якунлади. Бу ҳақда инсайдер Фабрицио Романо ўзининг X (собиқ Twitter) саҳифасида маълум қилди.
Манбага кўра, трансфер суммаси 75 миллион евро (65 миллион фунт)ни ташкил этган. Қайд этилишича, Семеньо 8 январь, пайшанба куни тиббий кўрикдан ўтгач, “шаҳарликлар” билан узоқ муддатли шартнома имзолайди. Бу орқали Семеньо “Борнмут” тарихидаги энг қиммат сотилган футболчига айланди.
Хабарда айтилишича, ганалик вингер “Манчестер Сити”га ўтиш учун Англия Премьер Лигасининг тўрт клубидан тушган таклифни рад этган. Трансферда футболчининг испаниялик мутахассис Хосеп Гвардиола қўл остида ишлаш истаги ҳал қилувчи омил бўлган.
Футболчига Англиянинг бошқа жамоалари ҳам, жумладан, “Тоттенҳэм”, “Ливерпуль”, “Челси” ва “Манчестер Юнайтед” ҳам қизиқиш билдиргани ҳақида хабарлар тарқалган эди. Аммо якунда “Манчестер Сити” футболчи билан келишувга эришди.
Жорий мавсум 25 ёшли Антуан Семеньо АПЛ доирасида жами 19 та учрашувда майдонга тушиб, ўз ҳисобига 9 та гол ва 3 та голли узатма ёздириб қўйган. Transfermarkt портали футболчининг қийматини 55 миллион еврога баҳоламоқда.
