Англиянинг “Манчестер Сити” клуби мамлакатнинг бошқа бир жамоаси “Борнмут” сафида тўп тепаётган футболчи Антуан Семеньо трансфери бўйича келишувга эришди. Бу ҳақда журналист Бен Жейкобс ўзининг X (собиқ Twitter) тармоғидаги саҳифасида хабар берди.
Манбага кўра, ҳозирда томонлар трансферга оид сўнгги ҳужжатларни расмийлаштириш билан банд. Битим яқин 24 соат ичида расман эълон қилиниши, шунингдек, унинг тафсилотлар очиқланиши кутилмоқда.
Аввалроқ “шаҳарликлар” Семеньо учун бонуслар ва агентлик тўловларини ҳисобга олган ҳолда қарийб 65 миллион фунт стерлинг миқдоридаги товон пулини тўлаши ҳақида хабарлар тарқалган эди. Қайд этилишича, “Манчестер Сити” ушбу суммани уч йил давомида тўлашни режалаштирмоқда.
Футболчига Англиянинг бошқа жамоалари ҳам, жумладан, “Тоттенҳэм”, “Ливерпуль”, “Челси” ва “Манчестер Юнайтед” ҳам қизиқиш билдиргани ҳақида хабарлар тарқалган эди. Аммо якунда “Манчестер Сити” футболчи билан келишувга эришди.
Маълумот учун, жорий 25 ёшли футболчи Англия Премьер Лигаси доирасидаги 18 та учрашувда майдонга тушиб, ўз ҳисобига 9 та гол ва 3 та голли узатма ёздириб қўйган. Унинг “Борнмут” билан шартномаси 2030-йилга қадар амал қилади. Transfermarkt портали футболчининг қийматини 55 миллион еврога баҳоламоқда.
