“Борнмут” футболчиси Антуан Семеньо фаолиятини фаолиятининг Англия Премьер Лигасининг бошқа бир жамоасида давом эттириши мумкин. Fichajes нашри хабарига кўра, ганалик вингерга “Манчестер Сити” жиддий қизиқиш билдирмоқда.
Манбада ёзилишича, “шаҳарликлар” қишки трансфер ойнаси вақтида ҳужум чизиғини кучайтиришни мақсад қилган. Антуан эса ушбу позиция учун идеал номзод ҳисобланади. “Манчестер Сити” вингерни январь ойида 65 миллион фунт стерлинг (тахминан 80 миллион евро) эвазига сотиб олишни мақсад қилган.
“Борнмут” футболчини сотишни истамаяпти, аммо унинг шартномасида махсус банд бор. Яъни футболчи клубдан кетишни истаса ҳамда харидор жамоа шартномада белгиланган товон пулини тўлаб берса, “Борнмут” Семеньонинг кетишига қаршилик қила олмайди. “Манчестер Сити” эса айнан шундай йўл тутмоқчи.
Аввалроқ Антуанга Англия Премьер Лигасининг бошқа бир жамоаси — “Ливерпуль” ҳам қизиқиш билдиргани ҳақида хабарлар тарқалганди. Унга кўра, мерсисайдликлар 25 ёшли вингерни Муҳаммад Салоҳ учун ўринбосар сифатида кўрмоқда.
Маълумот учун, жорий мавсумда Семеньо Англия Премьер Лигаси доирасида жами 13 ўйинда иштирок этиб, 6 та гол ва 3 та голли узатма муаллифига айланди. Transfermarkt портали футболчининг қийматини 55 миллион еврога баҳоламоқда. Унинг клуб билан шартномаси 2030-йилнинг ёзига қадар амал қилади.
