“Борнмут” вингери Антуан Семеньо яқин 48 соат ичида “Манчестер Сити” сафига ўтиши кутилмоқда. Бу ҳақда инсайдер Бен Жейкобс ўзининг X (собиқ Twitter) тармоғидаги саҳифасида хабар берди.
Манбага кўра, 29 декабрь куни тўловлар бўйича ўтган ижобий музокаралардан сўнг трансфер борасида сезиларли силжиш кузатилган. Қайд этилишича, Семеньо “Манчестер Сити” билан шартнома шартларини аллақачон оғзаки тарзда келишиб олган. Шу билан бирга, футболчи “Челси”га қарши баҳсда “Борнмут” сафида сўнгги бор майдонга тушиши кутилмоқда. Англия Премьер Лигасининг 19-туридан ўрин олган ушбу учрашув 30 декабрь, сешанба куни бўлиб ўтади.
ОАВ маълумотларига кўра, Антуан Семеньонинг “Борнмут” билан шартномасида 65 миллион фунт стерлинг (тахминан 75 миллион евро) миқдоридаги товон пули белгиланган. Ушбу банд фақат 2026 йил 10 январгача амал қилади. Клуб мазкур муддатни атайлаб чеклаган, чунки эҳтимолий трансфердан сўнг футболчининг ўрнига муносиб номзод топиш учун вақт ютишни режалаштирган.
Антуан Семеньо 2023 йил январидан буён “Борнмут” сафида тўп суриб келмоқда. Шу вақт давомида у барча мусобақалар доирасида жами 106 та учрашувда майдонга тушиб, ўз ҳисобига 30 та гол ва 13 та голли узатма ёздириб қўйган. Футболчининг клуб билан амалдаги шартномаси 2030 йил ёзигача мўлжалланган. Transfermarkt портали маълумотларига кўра, Семеньонинг бозор қиймати 65 миллион еврони ташкил этади.
