“Манчестер Сити” яқин вақт ичида “Борнмут” ҳужумчиси Антуан Семеньо трансферини эълон қилиши мумкин. Бу ҳақда инсайдер Фабрицио Романо ўзининг X (собиқ Twitter) саҳифасида маълум қилган.
“Сўнгги 12 соат ичида ‘Манчестер Сити’ ‘Борнмут’ ҳужумчиси Антуан Семеньо билан шартнома имзолаш учун максимал даражада ҳаракат қилди. ‘Шаҳарликлар’ яқин кунлар ичида ганалик футболчи билан шартнома имзолаганини эълон қилиши мумкин”, дейди Романо.
Манбага кўра, Семеньонинг ўзи ҳам “Манчестер Сити” билан шартнома имзолашга тайёр эканлигини билдирган. Қайд этилишича, “Тоттенҳэм” ва “Челси” “Борнмут” ҳужумчиси учун кечган курашда пойгадан чиққан.
Антуан Семеньо 2023 йил январидан буён “Борнмут” сафида тўп суриб келмоқда. Шу вақт давомида у барча мусобақалар доирасида жами 106 та учрашувда майдонга тушиб, ўз ҳисобига 30 та гол ва 13 та голли узатма ёздириб қўйган. Футболчининг клуб билан амалдаги шартномаси 2030 йил ёзигача мўлжалланган. Transfermarkt портали маълумотларига кўра, Семеньонинг бозор қиймати 65 миллион еврони ташкил этади.
