Париж меҳнат суди “Пари Сен-Жермен” (“ПСЖ”) клубини ҳужумчи Килиан Мбаппега тўланмаган маош ва бонуслар учун 60 миллион евродан ортиқ маблағни тўлашга мажбур қилди. Бу ҳақда “Euro News” нашри хабар берди.
Ўтган ой адвокатлар судда даъволар бўйича ўз далилларини тақдим қилган эди. 16 декабрь, сешанба куни суд Мбаппенинг фойдасига қарор чиқарди. Франциялик футболчи собиқ клуби раҳбарияти устидан судга шикоят қилиб, чекланган муддатли шартномани (SDD) доимий шартномага (SDI) ўтказмаслик, 55 миллион евро маош ва бонусларни тўламаслик ҳамда охирги йилларда руҳий босим ўтказганини билдирган. Шунинг учун “ПСЖ” футболчига 260 миллион евродан ортиқ маблағ тўлашга мажбур эканлигини даъво қилган. “ПСЖ” эса бунга жавобан Мбаппенинг ўзи клубга 440 миллион евро тўлаши кераклигини таъкидлаган. Парижликларнинг фикрича, у “бепул кетмаслик” ҳақидаги ваъдасини бузган. Шунингдек, Мбаппе “Реал”га ўтишидан олдин “Ал-Ҳилол”нинг 300 миллион евролик таклифини рад этган.
“Мбаппе етти йил давомида, ҳатто шартномасининг охирги кунигача барча спорт ва молиявий мажбуриятларини тўлиқ бажарди. У судга мурожаат қилмаслик учун барча чораларни кўрди. Умуман олганда, у ўз маоши ва бонусларини 18 ойдан ортиқ вақт давомида талаб қилиб келган”, деди ҳужумчининг адвокати.
Суд “ПСЖ” Мбаппенинг уч ойлик маоши, ахлоқий бонуси ҳамда меҳнат шартномасида кўзда тутилган имзо бонусини тўламаганини аниқлади. Мазкур суммалар Франция профессионал футбол лигаси (LFP) томонидан 2024 йил сентябрь ва октябрь ойларида қабул қилинган икки қарор асосида тўланиши лозим деб топилди.
Бироқ Мбаппенинг айрим қўшимча даъволари, жумладан, яширин меҳнат, ахлоқий босим ва иш берувчининг хавфсизлик мажбуриятларини бузиш ҳақидаги айбловлари суд томонидан рад этилди. Шунингдек, суд Мбаппенинг муддатли шартномасини доимий шартнома сифатида тан олмади, бу эса ишдан бўшатиш ва огоҳлантириш тўловлари билан боғлиқ эҳтимолий компенсация миқдорини чеклади.
