Франция терма жамоаси ва “Реал Мадрид” ҳужумчиси Килиан Мбаппе собиқ клуби “Пари Сен-Жермен”дан 250 миллион евро миқдорида компенсация талаб қилмоқда. Бу ҳақда Le Parisien нашри хабар берди.
Унга кўра, франциялик футболчи собиқ клуби раҳбарияти устидан судга шикоят қилиб, чекланган муддатли шартномани (SDD) доимий шартнома (SDI) га ўтказмаслик, 55 миллион евро маош ва бонусларни тўламаслик ҳамда охирги йилларда руҳий босим ўтказилганини айтмоқда.
“ПСЖ” эса бунга жавобан Мбаппенинг ўзи клубга 440 миллион евро тўлаши кераклигини таъкидлаган. Парижликларнинг фикрича, у “бепул кетмаслик” ҳақидаги ваъдасини бузган. Шунингдек, Мбаппе “Реал”га ўтишидан олдин “Ал-Ҳилол”нинг 300 миллион евролик таклифини рад этган.
Мбаппе май ойида “ПСЖ”га қарши яна бир шикоят киритган — унда футболчи клубни “маънавий босим ўтказиш” ва “таҳдид орқали мажбурлашга уриниш”да айблаган. Хусусан, 2023 йил ёзида шартномани узайтиришни хоҳламагани учун уни жамоа машғулотларидан четлатиш ҳолати кўрсатилган.
Маълумот учун, Мбаппе 2023/24-йилги мавсум якунида “ПСЖ” билан шартномасини узайтирмай, “Реал Мадрид”га эркин агент сифатида ўтган. У Париж клубида 6 маротаба Франция чемпионлиги, 4 марта мамлакат кубогини қўлга киритди ва 256 та гол билан клуб тарихидаги энг яхши тўпурарга айланди.
