“Реал Мадрид” клубининг собиқ парҳезшуноси (нутрициологи) Ициар Гонсалес ижтимоий тармоқларда жамоа шифокорлари ҳақида кутилмаган маълумотларни очиқлади. COPE нашрининг ёзишича, клуб шифокорлари Килиан Мбаппенинг жароҳатланган чап тиззаси қолиб, соғлом ўнг тиззасини даволашган. Бу хатоликдан сўнг Мбаппе ғазабланган ва бошқа шифокор ёрдамида тиззасини даволатган. Шу воқеа сабабли январь ойида клубнинг бутун тиббий штаби ишдан ҳайдалган.
Жамоада 2021 йилдан 2025 йилгача ишлаган Гонсалеснинг айтишича, “Реал”да футболчиларга витамин ва қўшимча дори-дармонларни ChatGPT’нинг бепул версияси маслаҳати билан беришган.
“Қайси бири ёмонроқ эканини ҳам билмайман: тиззани адаштириб даволашми ёки клубда витаминларни ChatGPT’нинг бепул версиясидан сўраб беришларими?”, деб ёзади Гонсалес.
Шунингдек, мутахассис клуб раҳбариятидан футболчиларнинг соғлиғини хавф остига қўядиган, “таниш-билишчилик” орқали келган билимсиз ходимлардан воз кечишни сўраган.
“Килианга раҳмат. Умид қиламанки, клуб энди футболчиларнинг соғлиғини хавфга қўядиган ҳаваскорларни эмас, балки билимли профессионалларни ишга олади”, дея қўшимча қилди мутахассис.
Хабарларга кўра, ушбу воқеалар ортидан “Реал” тиббий департаментида катта тозалаш ишлари ўтказилган ва ҳозирда клуб янги шифокорлар жамоасини шакллантирмоқда.
Маълумот учун, Испания Ла Лиганинг 29-туридан сўнг “қаймоқранглилар” 69 очко билан турнир жадвалида иккинчи ўринда бормоқда. Пешқадам “Барселона” ҳисобида эса 29 та учрашувдан кейин 73 очко мавжуд.
