Мадриднинг “Реал” клуби дарвозабони Тибо Куртуа “қаймоқранглилар” ҳужумчиси Килиан Мбаппе ҳамда жамоанинг собиқ футболчиси Криштиану Роналдунинг ўхшаш ҳамда фарқли жиҳатлари ҳақида сўралган саволга жавоб берди.
“Мен Криштиану билан бир жамоада ўйнамаганман, чунки мен келган ёзда Роналду ‘Ювентус’га ўтган эди. Уларни лидерлик фазилатлари бўйича таққослашнинг ўзи тўғри эмас, деб ўйлайман. Криштиану доимо ғалабага кўпроқ чанқоқ бўлган, Килиан эса бир оз бошқачароқ.
Аммо бу йил Мбаппе тобора ғалаба руҳини ўзида кўрсатадиган, жамоани олдинга тортадиган футболчига айланиб боряпти. Ҳозир бемалол айтиш мумкинки, Килиан — бизнинг етакчимиз. Ҳар бир ўйинда бу янада яққолроқ кўриниб бораверади”, дея Куртуанинг сўзларини келтиради COPE нашри.
Маълумот учун, Роналду ҳозир 40 ёшда. У беш карра Чемпионлар Лигаси ғолиби, Европа чемпиони ва икки карра Миллатлар Лигаси чемпиони. Шунингдек, у терма жамоалар, Европа чемпионатлари, Чемпионлар Лигаси ва клублар ўртасидаги Жаҳон чемпионатлари тарихидаги энг яхши тўпурар ҳисобланади.
Ҳужумчи 2022 йил декабрдан бери “Ан-Насср” сафида тўп сурмоқда. Аввалроқ у Португалиянинг “Спортинг”, Англиянинг “Манчестер Юнайтед”, Италиядаги “Ювентус” ва Испаниядаги “Реал Мадрид” клубларида ҳам ўйнаган.
Килиан Мбаппе эса 2024 йил “қироллик клуби” сафига қўшилган. Француз ҳужумчиси бунга қадар “Монако” ҳамда “ПСЖ” шарафини ҳимоя қилган.
