Бўлажак куёв алдов йўли орқали келиннинг ҳовлисини сотиб юборгани билан боғлиқ иш Жиноят ишлари бўйича Мирзо Улуғбек туман судида кўриб чиқилаётгани хабар берилган эди. Суднинг 20 ноябрь куни давом этган навбатдаги мажлисида адвокатлар блогер Реал Санжикни ҳам жиноят ишига тортиш кераклигини айтмоқда. Бу ҳақда судда қатнашган “Дарё” журналисти хабар берди.
Жабрланувчи оиланинг яна бир адвокати эса Санжар Каримов билан боғлиқ ҳолатларни судланувчи Шаҳзод Рисматовнинг жиноятидан айириб бўлмаслигини таъкидламоқда.Фирибгарлик ҳолати прокуроримиз айтиб ўтганидек исботини топди. Аммо зарар қопланмади. Уй эгасига қайтарилмади. Олимбоевлар оиласи кўчада қолмоқда. Суд тергови давомида барча гувоҳлар сўроқ қилинди, видео ва аудиозапислар эшитилди. Бугун Олимбаев Муҳаммадамин аканинг ўзлари ҳаммасини тушунтириб берди. Ва скриншотлар тақдим қилинди. Бу ҳолатларнинг ҳаммаси Рисматов Шаҳзоднинг айбини тасдиқловчи далиллар бўлиб, исбот учун етарли деб ҳисоблайман. Бундан ташқари суд терговида Каримов Санжарни эшитдик, сўроқ қилдик, гувоҳ, видеозапислар эшитилди. Ҳаммасида шу Каримов, Каримов, Каримов. Рисматов ҳам фақат шу Санжар Каримов демоқда. Мен суд-тергов вақтида жавобгарликка тортилмаган шахс томонидан жиноят содир этилганлигини кўрсатувчи ҳолатлар аниқланганини, шу сабаб Ўзбекистон Республикаси Жиноят-процессуал кодексининг 417-моддасига асосан бу ҳақда прокурорга хабар берилиши керак деб ҳисоблайман. Мен музокара якунида Олимбоевлар эпизоди бўйича прокурорга махсус хабар берилса ёки иш материаллари қисман қайтарилса, уларнинг шу жиноят ишида жавобгарлик, иштирокчилик масаласи кўриб чиқилишини сўрайман”, — деди адвокат Қодиржон Раҳимов.
“Дело” бир қанча терговчиларнинг қўлидан ўтган. Ҳеч ким бунга чуқур ёндашмаган. Аслида уй ўзидан-ўзи дарров сотилиб кетмайди. Уй оладиган одам агар олди-сотди бўладиган бўлса, албатта уйни келиб кўрар эди. Айбланувчи Шаҳзод Рисматов уйни бир ўзи сотмаган. Бир ўзи бу жиноий ишни қилмаган. Бу ҳолатда Каримов Санжарнинг ҳам ҳаракатларига баҳо бериш керак. Ишда Каримов Санжарнинг ҳаракатига баҳо берилмаган. Ҳолат очиқ қоляпти. Бу жиноят ишида Каримов ёки яна бошқалар ҳам бўлиши мумкин. Шунинг учун мен Жиноят-процессуал кодексининг 417-моддаси талабларидан келиб чиққан ҳолда уларнинг ҳаракатига баҳо берилишини илтимос қилардим. Бу қонун талаби, — деди адвокат.
2025-йилнинг 14 ноябрь куни бўлиб ўтган суд мажлисида блогер Реал Санжик Жамила Олимбоева ҳамда унинг оила-аъзолари уйни 240 минг долларга сотганини, пулни нотариус олдида уларга берганини айтганди.
2024-йилнинг 6 август куни Рисматов Шаҳзод менга қўнғироқ қилиб, “Ока, беш сотихли уй бор, шуни сотмоқчимиз, бизга ёрдам қилинг. Яқинларимнинг уйи”, деган. Мен 240 минг доллар таклиф қилганман. Сотсанг шу бошқа қўшолмайман деганман. 7 август куни яна телефон қилиб, “Ока, рози бўлишди. Бу нархга беришга тайёр. Нотариусда кўришамиз”, деган. Нотариусда хонадон эгалари билан танишдим. У ерда папкамдаги 265 минг доллар пулнинг 25 минг долларини олиб қолиб, 240 минг долларни уй эгаларига бердим, — деганди у.
