АҚШда сунъий интеллектдан юридик ёрдам сўраётган фуқаролар сони ортиб бормоқда. Баъзи ҳолларда фойдаланувчилар профессионал ҳуқуқшунослар ўрнига тўлиқ сунъий интеллектдан фойдаланмоқда. Бу ҳақда NBC News хабар бермоқда.
Масалан, Лонг-Бич (Калифорния) аҳолиси Линн Уайт кўчириш тўғрисидаги иш бўйича апелляцияни тайёрлашда суд қарорларини таҳлил қилиш ва далилларни ишлаб чиқиш учун ChatGPT ва Perplexity’дан фойдаланганини билдирган. Натижада у кўчиришни бекор қилишга ва 70 минг доллардан ортиқ жарима ҳамда қарздорликдан қутулишга эришган. Аввалроқ эса унинг адвокати бу ишда ютқазган эди.
Шунга ўхшаш тажрибани ню ёрклик Ричард Хоффманн ҳам баён қилди. У сунъий интеллект ёрдамида ҳимоя стратегиясини ишлаб чиқиб, собиқ иш берувчисига қарши фуқаролик жараёнида ўзини мустақил ҳимоя қилган.
Бундай мисоллар мавжудлигига қарамай, ишлаб чиқувчилар сунъий интеллектни ҳуқуқий маслаҳатларнинг ягона манбаи сифатида ишлатишдан огоҳлантиришмоқда. 2023-йилда OpenAI компаниясининг GPT-4 модели адвокатлик имтиҳонини юқори натижа билан топширган бўлса-да, Массачусетс технология институти тадқиқотчилари тизим фақатгина қайта имтиҳон топширганлар орасидаги энг яхши 10 фоизликка кирганини таъкидлаган.
Бундан аввал Флорида штатида 13 ёшли мактаб ўқувчиси ChatGPT’дан дўстини қандай ўлдириш мумкинлигини сўрагач, ҳибсга олингани хабар қилинганди.
Миссури штатида полиция автомобильларга оммавий шикаст етказишда гумонланаётган 19 ёшли талаба Райан Шеферни қўлга олган. Спрингфилд полицияси маълумотларига кўра, воқеадан сўнг йигит дарҳол ChatGPT билан ёзишмаларда ўз қилмишини тан олган. Бундан ташқари у вандализм учун жавобгарликдан қандай қутулиш мумкинлиги ҳақида сўраган.
