“Манчестер Юнайтед” клуби “Ноттингем Форест” ярим ҳимоячиси Эллиот Андерсонга жиддий қизиқиш билдирмоқда. Бу ҳақда The Sun нашри хабар берди.
Манбага кўра, манкунианликлар устози Рубен Аморимнинг шахсан ўзи мазкур трансфер устида ишламоқда. “Ноттингем Форест” раҳбарияти “қизил иблислар”нинг 22 ёшли футболчини ўз сафига қўшиб олиш истагидан хабардор, бироқ улар Андерсонни фақат 100–120 миллион фунт стерлинг (тахминан 114–134 миллион евро) эвазига қўйиб юборишга тайёр. Агар мазкур трансфер амалга ошса, бу “Манчестер Юнайтед” тарихидаги энг қиммат харидга айланади. Клубнинг ҳозирги трансфер рекорди 2016-йилда ўрнатилган бўлиб, ўшанда “Ювентус”дан Пол Погба 105 миллион евро эвазига сотиб олинганди.
“Манчестер Юнайтед” раҳбарияти Андерсонни Каземирога муносиб ўринбосар сифатида кўрмоқда. Бразилиялик футболчи сўнгги ўйинларда гол уриб, жамоа ғалабаларига ҳисса қўшаётган бўлса-да, Андерсон клубнинг узоқ муддатли стратегиясига кўпроқ мос келадиган ўйинчи сифатида баҳоланмоқда.
Маълумот учун, жорий мавсум Андерсон барча мусобақаларда 14 та ўйинда майдонга тушиб, битта гол ва битта голли узатмага муаллифлик қилган. Унинг “Ноттингем Форест” билан амалдаги шартномаси 2029 йил ёзигача мўлжалланган. Transfermarkt маълумотига кўра, футболчининг бозор қиймати 45 миллион еврони ташкил этади.
