Англия Премьер Лиганинг икки етакчи клуби — “Манчестер Сити” ва “Манчестер Юнайтед” ёзги трансфер ойнаси вақтида “Ноттингем Форест” ярим ҳимоячиси Эллиот Андерсонни ўз сафига қўшиб олиш учун кураш олиб бормоқда. Бу ҳақда Fichajes нашри хабар берди.
23 ёшли англиялик футболчи жорий мавсум ўз ўйини билан чемпионатнинг энг кучли ярим ҳимоячиларидан бирига айланган. “Ноттингем Форест” эса ўз етакчисини қўйиб юборишга шошилмаяпти. Бироқ яхши таклиф тушса, уни сотиш имкониятини ҳам кўриб чиқиши мумкин. Шу боис “ўрмончилар” Эллиотнинг трансфер нархини 90 миллион евро этиб белгилаган.
“Манчестер Сити” раҳбарияти таркибни ёшартириш билан бирга, тўпни назорат қиладиган футболчи қидирмоқда. Андерсон эса уларнинг талабига тўлиқ мос келади. Ўз навбатида, “Манчестер Юнайтед” ҳам барқарорликни таъминлаш ва таркибни кучайтириш учун ушбу трансферни амалга ошириш устида иш олиб бормоқда. Шунингдек, футболчининг кўп қирралилиги — ҳам таянч, ҳам ҳужумкор ярим ҳимоя чизиғида ўйнай олиши ҳар икки клубга ҳам маъқул келган.
Маълумот учун, футболчи жорий мавсум “Ноттингем Форест” сафида жами 35 та учрашувда иштирок этиб, ўз ҳисобига 1 гол ва 3 ассист ёздириб қўйган. Унинг клуб билан шартномаси 2029-йилнинг ёзига қадар амал қилади. Transfermarkt портали унинг қийматини 60 миллион еврога баҳоланмоқда.
