АҚШ президенти Дональд Трамп Венгрияни Россия нефть ва газини сотиб олишни давом эттираётгани учун бир йилга санкциялардан озод қилди. Бу ҳақда Оқ уй расмийси BBC News’га маълумот берди.
Трамп аввалроқ Венгрия бош вазири Виктор Орбан учун алоҳида истисно бериш масаласини кўриб чиқишини айтганди. Орбан — Трампнинг яқин сиёсий иттифоқчиси бўлиб, Украина уруши бошланганидан бери Россия билан илиқ муносабатларни сақлаб келмоқда.
7 ноябрь куни Оқ уйда бўлиб ўтган учрашув чоғида Трамп шундай деган:
“Орбан учун бошқа манбалардан нефть ва газ топиш жуда қийин. Шу сабабли, истисно бериш ҳақида ўйлаяпмиз”.
Бу қарор АҚШ октябрь ойида Россиянинг йирик нефть компанияларига санксиялар қўллаганидан сўнг қабул қилинмоқда. Оқ уйдаги учрашувдан сўнг Венгрия ташқи ишлар вазири Петер Сийярто ижтимоий тармоқда қуйидагича пост қолдирган:
“Будапештга нефть ва газ бўйича санкциялардан тўлиқ ва чекланмаган озодлик берилди”.
Бироқ Оқ уй бу имтиёз фақат бир йилга мўлжалланганини таъкидлаб, аниқлик киритган. Бу қарор Орбан учун катта сиёсий ғалаба ҳисобланади. У илгари санксиялар мамлакат иқтисодиётини оғир аҳволга солишини айтиб, хавотир билдирган эди.
Венгрия учрашув доирасида АҚШдан юз миллионлаб долларлик табиий газ харид қилишга ҳам рози бўлган. Аммо бу битим кўплаб Европа давлатлари томонидан танқид қилиниши кутилмоқда — улар Венгриянинг Россияга нисбатан юмшоқ сиёсатини ёқтирмайди.
Трамп, Венгрия денгизга чиқиш имконига эга бўлмаган давлат сифатида мураккаб ҳолатда эканини тан олган. Орбан эса Россия билан энергия алоқаларини ҳимоя қилиб, “қувурлар сиёсий ёки мафкуравий масала эмас, балки географик зарурат” эканини таъкидлаган. У келаси баҳорда бўладиган сайловлар олдидан сайловчиларга “арзон Россия энергияси”ни ваъда қилмоқда.
