АҚШ ва Исроилнинг Эронга қарши уруши фонида нефтнинг жаҳон нархлари кескин ўсиши Россия бюджетига кунига, тахминан, 150 миллион доллар қўшимча даромад келтирмоқда. Бу ҳақда соҳа таҳлилчиларининг ҳисоб-китобларига таяниб Financial Times хабар берди.
Таҳлилчиларнинг ҳисоб-китобларига кўра, агар Россия нефтининг ўртача нархи бир баррел учун 70-80 долларни ташкил қилса, март ойи охирига бориб Россия ҳукумати жами 3,3-4,9 миллиард доллар қўшимча даромад олиши мумкин. Февраль ойида Россия нефтининг ўртача нархи бир баррел учун қарийб 45 доллар бўлган.
Хом ашё бозорларига ихтисослашган Кплер компаниясининг етакчи таҳлилчиси Сумит Ритолиянинг фикрича, Яқин Шарқдаги янги урушда айнан Россия “асосий ғолиб” сифатида кўрилмоқда.
“Ва бу — тарихдаги энг йирик энергетика инқирозининг бошланишигина, холос”, деб ёзган Россия президентининг махсус вакили Кирилл Дмитриев X ижтимоий тармоғида ФТ нашрига берган изоҳида.
Мақола эълон қилингач, АҚШ ҳукумати Россиянинг Украинага қарши уруши туфайли жорий этилган нефть санкцияларини вақтинча юмшатишини маълум қилган. Унга кўра, агар нефть ва нефть маҳсулотлари кемаларга 12 мартгача юкланган бўлса, уларни етказиб беришга рухсат этилади.
The Белл нашри келтирган маълумотларга кўра, 6 март ҳолатига кўра, танкерларда 130 миллион баррелга яқин Россия нефти бўлган ва унинг катта қисми санкциялар туфайли йўлда ушланиб қолган.
- Нефть нархлари юқорилигича қолмоқда
АҚШ Россия нефтини сотиб олишга рухсат берганига қарамай, энергетика бозорларидаги вазият кескинлигича қолмоқда. 14 март куни Шимолий денгиз нефти бўлган Brent котировкалари бир оз пасайган ва бир баррел учун 100 доллар атрофида тебраниб турибди. Американинг WTI маркаси эса 0,8 фоизга арзонлаб, 94,93 долларни ташкил этди.
Нефть бозоридаги беқарорликни юмшатиш мақсадида АҚШ Энергетика вазирлиги 11 март куни Халқаро энергетика агентлигига (ХЭА) аъзо 32 давлатнинг бозорга жами 400 миллион баррел нефть чиқариш бўйича умумий келишуви доирасида стратегик захирадан 172 миллион баррел ажратилишини эълон қилди.
