АҚШ президенти Дональд Трамп Венесуэлада қазиб олинаётган нефтни Россия ва Хитойга сотишга тайёрлигини билдирди. Бу ҳақда у 9 январь, жума куни Оқ уйда йирик энергетика компаниялари раҳбарлари билан учрашувида ма`лум қилган.
Учрашув давомида Венесуэланинг нефть саноатини тиклаш масаласи муҳокама қилинган. Музокаралардан олдин Трамп ўзининг Truth Social ижтимоий тармоғидаги саҳифасида Венесуэла нефть секторига камида 100 миллиард доллар сармоя киритиш ниятини эълон қилди. Маблағларни компанияларнинг ўзлари киритиши кўзда тутилган.
Трампнинг айтишича, Венесуэла нефть бозорига кириш бўйича музокараларни фақат АҚШ ҳукумати олиб боради.
Шунингдек, АҚШ президенти мамлакат бизнесга очиқлигини ва Венесуэла билан стратегик ҳамкорлигини таъкидлаб, Москва ва Пекин хоҳлаганча нефть сотиб олиши мумкинлигини, етказиб бериш эса деярли зудлик билан йўлга қўйилишини билдирган.“Сиз фақат биз билан тўғридан тўғри музокара олиб борасиз, Венесуэла билан умуман муҳокама қилмайсиз. Биз буни хоҳламаймиз”, деган АҚШ президенти компаниялар раҳбарлари билан учрашувда.
Бундан ташқари у Москва ва Пекинни Венесуэла бўйича режалари ҳақида олдиндан огоҳлантирганини ва бу мамлакатлар халқларига дўстона муносабатда эканини таъкидлаган.“Хитой биздан истаганча нефть сотиб олиши мумкин. Россия ўзига керак бўлган барча нефтни биздан олиши мумкин. Ҳа, гарчи ўзлари катта миқдорда ишлаб чиқарса-да, уларга нефть ёқади. Бироқ Хитой, Россия ва бошқалар бизга мурожаат қилиши мумкин ва биз деярли дарҳол бизнес учун очиқ бўламиз”, деди Оқ уй раҳбари.
“АҚШ Хитойнинг нефтга ортиб бораётган талабини қондиришга ва Россия билан узоқ муддатли иқтисодий алоқаларни сақлаб қолишга тайёр”, деган Трамп.
АҚШ ҳарбийлари 9 январь куни эрта тонгда Кариб денгизида Венесуэла билан алоқадор бўлган “Олина” нефть танкерини қўлга олди.
Дональд Трамп 8 январь куни эълон қилинган интервьюсида мамлакатнинг Венесуэла устидан назорат ўрнатиши ва унинг нефть даромадларини бошқариши йиллар давом этиши мумкинлигини айтди.
