Россиянинг нефть ва газ ортилган икки кемаси АҚШ президенти Дональд Трамп томонидан жорий этилган энергетика эмбаргосига қарамай, жиддий ресурс тақчиллигини бошдан кечираётган Кубага йўл олди. Денгиз разведкаси маълумотларига кўра, юклар келаси ҳафта манзилга етиб бориши кутилмоқда. Бу ҳақда The Financial Times хабар берди.
Агар ушбу кемалар манзилга етиб борса, бу Кубага сўнгги уч ой ичида етказиб берилган илк энергия ресурслари бўлади. Оролнинг бутун энергетика тизими 16 март куни вайрон бўлиб, мамлакат электрсиз бутунлай зулматда қолди. Сешанба, 17 март кунига келиб электр таъминоти қисман тикланган бўлса-да, иқтисодий инқироз янада чуқурлашган.
Ҳозирда орол давлатга қуйидаги кемалар келиши кутилмоқда:
- Гонгконг байроғи остидаги Sea Horsе кемаси тахминан 27 минг тонна Россия гази билан 23 март етиб келиши кутилмоқда.
- Россия байроғи остидаги “Анатолий Колодкин” номли кема 100 минг тонна (тахминан 725-728 минг баррел) хом нефть билан 4 апрель куни Куба қирғоқларига келиши тахмин қилинмоқда.
АҚШ президенти Дональд Трамп жорий ҳафтада Кубани “қайсидир шаклда қўлга киритиш шарафига” эга бўлишидан хурсанд эканини билдирди. У Кариб ҳавзаси давлатини “дўстона эгаллаб олиш” ғоясини илгари сурмоқда.
“Тўғрисини айтсам, мамлакатни озод қиламанми ёки босиб оламанми — нима хоҳласам шуни қила оламан. Ҳозир Куб жуда заифлашган”, деди Трамп душанба куни.
Куба президенти Мигел Диас-Канел эса АҚШни ҳар куни конституциявий тузумни куч билан ағдариш ва мамлакат бойликларини эгаллаб олиш билан таҳдид қилишда айблади. У ҳар қандай ташқи агрессия енгилмас қаршиликка учрашидан огоҳлантирди.
Куба ўз эҳтиёжи учун зарур бўлган нефтьнинг атиги 40 фоизини ишлаб чиқаради. Авваллари асосий ҳомий бўлган Венесуэла 3 январда Николас Мадуро АҚШ кучлари томонидан ҳибсга олингач, етказиб беришни тўхтатди. Мексика ҳам Трампнинг босими остида январь ойидан бери ёрдамни чеклаган.
Гуманитар инқирознинг оқибатида ҳозирда касалхоналарда жарроҳлик амалиётлари бекор қилинган; чиқинди йиғиш ва озиқ-овқат етказиш тизими издан чиққан; авиакомпаниялар ёнилғи йўқлиги сабабли рейсларни тўхтатган.
Россия ташқи ишлар вазирлиги Куба ҳукумати ва биродар халқи билан собит бирдамлигини яна бир бор тасдиқлади. Гавана эса блокада қилиб бўлмайдиган энергия сифатида қуёш панелларини ўрнатиш ташаббусини илгари сурмоқда.
Шунингдек, ҳукумат иқтисодиётни жонлантириш учун хориждаги кубалик муҳожирларни оролда бизнес очишга ва сармоя киритишга ундамоқда. Бироқ АҚШнинг кенг кўламли эмбаргоси йирик савдо ва инвестицияларга тўсқинлик қилишда давом этмоқда.
