Мадриднинг “Реал” клуби ҳужумчиси Винисиус Жуниор “Барселона”га қарши ўйиндаги ноўрин ҳаракатлари учун мухлислар, жамоа аъзолари ва клуб раҳбариятидан узр сўради. Бу ҳақда футболчи ижтимоий тармоқдаги саҳифасида маълум қилди.
“Бугун мен ‘Реал’ мухлисларидан ‘Эл-Класикo’даги алмаштирилишимдан кейинги ҳаракатларим учун узр сўрамоқчиман. Худди шунингдек, бугунги машғулот вақтида жамоадошларим, мураббийлар штаби ва президент олдида ҳам узр сўрадим. Баъзан ҳис-туйғулар устун келади. Мен доимо ғалаба учун ҳаракат қиламан ва жамоамга ёрдам беришни хоҳлайман. Бу рақобатбардошлик туйғуси клубга бўлган муҳаббатимдан келиб чиқади. ‘Реал’ учун биринчи кунимдан бери қандай курашган бўлсам, бундан кейин ҳам шундай давом этаман”, деб ёзди Винисиус.
Маълумот учун, 26 октябрь куни бўлиб ўтган Испания чемпионати 10-тур учрашувида “Реал” “Барселона”ни 2:1 ҳисобида мағлуб этди. Винисиус 72-дақиқада алмаштирилди. DAZN маълумотига кўра, у мазкур қарордан кейин бош мураббий Хаби Алонсога клубни тарк этиш истагини ҳам билдирган.
25 ёшли бразилиялик футболчи 2018-йилдан бери “Реал” сафида тўп суради. У жамоа билан Испания чемпионатида уч карра, Чемпионлар Лигасида эса икки карра ғолиб бўлган. Винисиус “Реал” таркибида 335 ўйинда майдонга тушиб, ўз ҳисобига 111 та гол ва 87 та голли узатма ёздириб қўйган. Шу билан бирга, у Бразилия терма жамоаси сафида 43 та ўйинда 8 та гол ва 7 та ассист қайд этган.
