“Реал Мадрид” ҳужумчиси Винисиус Жуниор “Барселона” футболчиси Ламин Ямал билан “Эл-Класико”дан сўнг оғзаки тортишувга киришди. Yahoo Sports нашрининг хабар беришича, жанжалга Ямалнинг ўйиндан олдин подкастда билдирган фикрлари сабаб бўлган.
Ўйин якунлангач, Ямал кийим алмаштириш хонасига йўл олаётган пайтда Винисиус унга мурожаат қилиб, шундай деган:
“Сен фақат орқага пас берасан! Жуда кўп гапирасан. Қани энди, гапирчи!”
Маълумот учун, “Эл-Класико”дан олдин Ламин Ямал подкастда иштирок этиб, “Реал”ни танқид қилган эди:
“Улар доим ўйинларни сотиб олади. ‘Реал’ — ўғри ва товламачи. Бу уларнинг услуби”.
Ламиннинг ушбу гаплари ОАВда кўплаб муҳокамаларга сабаб бўлди. “Эл-Класико”дан кейинги жанжалга ҳам 18 ёшли футболчининг подкастда билдирган фикрлари сабаб бўлгани тахмин қилинмоқд.
Эслатиб ўтамиз, “Реал Мадрид” Ла Лиганинг 10-турида “Барселона”ни 2:1 ҳисобида мағлуб этди. Хаби Алонсо шогирдлари 27 очко билан турнир жадвалида биринчи ўринни эгаллаб турибди. “Барселона” эса 22 очко билан иккинчи ўринда бормоқда.
