Мадриднинг “Реал” клуби бош мураббийи Хаби Алонсо Испания Ла Лигаси 17-туридан ўрин олган “Севилья”га қарши (2:0) ўйин пайтида Винисиусга нисбатан бўлган ҳуштакбозлик бўйича изоҳ берди.
Бразилиялик футболчи учрашувнинг 83-дақиқасида захирага олинди. У майдондан чиқиб кетаётган пайтда мухлислар турли ҳаракатлар билан ўз норозилигини билдирди. Бироқ Виниусиус мухлисларнинг бу норозилигига ҳеч қандай жавоб қайтармади.
Ўйиндан кейинги матбуот анжуманида клуб бош мураббийи Хаби Алонсо ушбу вазиятга тўхталиб, мухлислар ўз фикрини эркин ифода этишга ҳақли эканлигини таъкидлади:
“Мухлислар ўз фикрини билдиришга ҳақли. Бугунги ўйин қийин кечди, лекин биз ўйинимизни янада яхшилашимиз кераклигини тушуниб турибмиз. Шу билан бирга, жамоанинг ҳозирги ҳолатини ҳам эътироф этиш керак. Футболчилар бугун яхши ўйнашди. Энди танаффусдан фойдаланиб, янги йилни ишонч билан бошлаймиз”, дейди испаниялик мутахассис.
Маълумот учун, айни пайтда “Реал” Испания чемпионати турнир жадвалида 42 очко билан иккинчи ўринни эгаллаб турибди. Жамоа етакчи “Барселона”дан тўрт очкога ортда қолмоқда.
