“Барселона” вингери Ламин Ямаль Испания Ла Лигасида декабрь ойининг энг яхши футболчиси деб топилди. Шу тариқа, 18 ёшли испаниялик футболчи каталонияликларнинг собиқ ҳужумчиси Лионель Месси, “Атлетико Мадрид” собиқ ҳимоячиси Диэго Годин ҳамда “Реал Мадрид”нинг жорий мавсумдаги тўпурари Килиан Мбаппе эришган натижани такрорлади.
Ла Лигада кетма-кет иккинчи ой энг яхши футболчи деб топилган Ямал ушбу совринни икки ой кетма-кет қўлга киритган тарихдаги тўртинчи футболчига айланди. Аввалроқ Диэго Годин 2014 йил апрель ва май ойларида, Лионель Месси 2018 йил апрель ва сентябрь ойларида (ўша йили май—август ойларида мукофот топширилмаган), Килиан Мбаппе эса жорий мавсумда сентябрь ва октябрь ойларида энг яхши футболчи деб топилган эди.
Маълумот учун, Ла Лигада “Ой футболчиси” мукофоти 2013 йил сентябрь ойидан бери топшириб келинади. Унинг илк совриндори ўша вақтда “Атлетико” сафида тўп сурган ҳужумчи Диэго Коста бўлган.
Бугун, 11 январдан 12 январга ўтар кечаси, Саудия Арабистонининг Жидда шаҳридаги “Қирол Абдулла” стадионида дунё футболидаги энг буюк қарама-қаршиликлардан бири — “Эл-Класико” бўлиб ўтади. Шу вақтга қадар “Реал” ва “Барса” 262 бор ўзаро тўқнаш келган бўлиб, 106 та баҳсда “Реал Мадрид”, 104 та учрашувда “Барселона” зафар қучган, 52 та ўйинда дуранг натижа қайд этилган. Мадридликлар 445, каталонияликлар эса 433 марта рақиб дарвозасига гол киритган.
