Исроил Бош вазири Биньямин Нетаньяху 22 октябрь куни Ғазо секторида Туркия хавфсизлик кучлари иштирокидаги ҳар қандай миссияга қарши экани ҳақида ишора қилди. Бу фикрни у Қуддусда АҚШ вице-президенти Жей Ди Венс билан бўлиб ўтган учрашувда билдирди.
Учрашувда Ғазодаги урушдан кейинги вазият, жумладан, ҳудуд хавфсизлигини ким таъминлаши муҳокама қилинган. Нетаньяху бу масалада кучли фикрга эга эканини айтиб, Туркия кучларининг иштирокига қаршилигини яширмаган:
“Бу борада биргаликда қарор қиламиз. Аммо мен бу масалада қатъий фикрдаман”, деган у.
Ўз навбатида, АҚШ вице-президенти Венс Трамп маъмуриятининг сулҳ режасини ижобий баҳолаб, сулҳ кутилганидан яхшироқ ўтаётганини таъкидлаган.
“Мен ҳеч қачон бу осон бўлади демаганман. Лекин умид бор: бу сулҳ барқарор сақланади ва биз бутун Яқин Шарқда яхшироқ келажак қуришимиз мумкин”, деган у.
Трамп режасининг кейинги босқичи ҲАМАСнинг қуролсизлантирилишини ва Ғазога халқафо хавфсизлик кучларинингҳ жойлаштирилишидир. Туркия эса, ушбу режани амалга оширишда иштирок этишга тайёрлигини билдирган. Анқара ҲАМАСни сулҳга кўндиришда муҳим рол ўйнаган ва агар керак бўлса, халқаро кучлар таркибида ҳарбий ёки фуқаролик шаклида иштирок этишга тайёрлигини очиқлаган.
Илгари бир оз ижобий бўлган Туркия–Исроил муносабатлари Ғазодаги уруш фонида ёмонлашган. Туркия президенти Ражаб Тоййиб Эрдўғон Исроилнинг Ғазодаги ва бошқа минтақалардаги ҳужумларини қаттиқ танқид қилиб келади.
