“Учинчи жаҳон уруши бўлмайди”: Ғазо бўйича тинчлик битими имзоланди (видео)

Шарм аш Шайх шарида 13 октябрь куни бўлиб ўтган Ғазо бўйича саммитда Миср, Қатар, Туркия ва АҚШ иштирокида тинчлик битими имзоланди. Қўшма Штатлар президенти Дональд Трамп буни Яқин Шарқдаги вазиятни буткул ўзгартирувчи воқеа сифатида баҳолади.

“Йиллар давомида Яқин Шарқ энг мураккаб минтақалиги айтиб келинган. Ҳатто Учинчи жаҳон уруши айнан шу ерда бошланиши мумкин дейишарди. Аммо энди бундай бўлмайди”, деган Трамп.

Саммит олдидан Трамп ва Миср президенти Абдулфаттоҳ ас Сиси матбуотга интервью берган. Унда АҚШ президенти Мисрнинг сулҳ музокараларидаги ролига алоҳида урғу берган.

Трамп саммитда сулҳ ҳақида гапирганида асосан Исроилни олқишлаган, аммо Фаластин томони ҳақида деярли ҳеч нима демаган.

“Бу — Яқин Шарқда янги давр тонги”, деган АҚШ президенти.

Исроил ва ҲАМАС ўртасидаги сулҳ эълон қилинганидан беш кун ўтиб, 20 нафар яҳудий асирлар озод этилган. Улар ҳозирда Исроил ҳудудида. Жавоб тариқасида, Исроил ҳам юзлаб фаластинлик маҳбусларни ватанига қайтарган. Шу билан бирга, Ғазо секторига инсонпарварлик ёрдамини киритиш учун чегара ҳудудида тайёргарлик ишлари олиб борилмоқда.