UzAutoMotors Chevrolet Cobalt автомобильининг икки янги комплектациясини — Cobalt Style МCМ ва Cobalt Midnight МCМ версияларини тақдим этди. Янги модификациялар 2025 йил 3 ноябрдан бошлаб барча Chevrolet диллерлик марказларида сотувга чиқарилади.
Компания маълум қилишича, янгиланишлар доирасида автомобильнинг 50 дан ортиқ муҳим компонентлари модернизация қилинган. Жумладан, янги двигатель бошқарув блоки ўрнатилиб, газ тақсимлаш ва электрон бошқарув тизимлари такомиллаштирилган, ABS тизими, хавфсизлик ёстиқчалари ва ҳимоя функсиялари бошқарув блоклари янгиланган.
Ҳар иккала янги версияда ҳайдовчи ва йўловчилар қулайлигига алоҳида эътибор қаратилган. Автомобиль круиз-назорат тизими билан жиҳозланиб, белгиланган тезликни автоматик ушлаб туриш имконини беради. Олд ўриндиқларнинг иситиш тизими эса совуқ мавсумда фойдаланиш қулайлигини оширади.
Янги модификацияларда сенсорли мултимедиа тизими ўрнатилган бўлиб, у Android Auto ва Apple CarPlay тизимларини қўллаб-қувватлайди. Шунингдек, янги асбоблар панели ҳамда рулдаги бошқарув тугмалари ҳайдовчи учун янада қулай бошқарув имкониятини яратади.
Midnight МCМ комплектацияси интерер ва экстерер дизайнида фарқ қилади. Салон экочарм қопламали, иситиладиган ўриндиқлар билан жиҳозланган, ички безаклар ва бошқарув элементлари тўлиқ қора рангда ишлаб чиқилган. Экстерерда қорайтирилган фаралар, қора рангдаги ён ойналар ва қуйма ғилдиракли дисклар автомобилга ўзига хос кўриниш беради.
Тавсия этилган чакана нархлар:
- Cobalt Style МCМ — 156 100 000 сўм
- Cobalt Midnight МCМ — 165 200 000 сўм
Шу билан бирга, мавжуд комплектациялар аввалги нархларда тақдим этилади:
- Style AT Plus — 147 916 000 сўм
- Midnight АТ — 155 231 000 сўм
UzAutoМоtors’нинг таъкидлашича, янгиланган Chevrolet Cobalt версиялари қулайлик, хавфсизлик ва технологик янгиликлар жиҳатидан аввалгилардан сезиларли даражада устун бўлади.
UzAutoМоtors 13 октябрь куни Damas ва Cobalt автомобиллари янгиланган версияси ишлаб чиқарилишини эълон қилган эди.
