Самарқандда аниқланган камчилик учун чора кўрмаслик эвазига пора талаб қилган Агроинспекция ходими қўлга тушди. Бу ҳақда Давлат хавфсизлик хизмати хабар қилди.
Қайд этилишича, инспекциянинг етакчи мутахассиси Самарқанд туманидаги фермер хўжаликда ўтказилган ўрганиш жараёнида 50 сотих ер майдонини ижарага олиб фойдаланаётган фуқаро томонидан ернинг унумдорлигига зарар етказилганлиги аниқланиб, унга нисбатан чора кўрмаслик эвазига 3 минг доллар талаб қилган.
Мансабдор пуллардан 500 долларини олган. Шундан сўнг қолган 2500 долларни олаётган вақтида ашёвий далиллар билан ушланди.
Унга нисбатан Жиноят кодексининг тегишли моддалари билан иш қўзғатилиб, қамоққа олиш тарзида эҳтиёт чораси қўлланилди. Ҳозирда тергов ҳаракатлари олиб борилмоқда.
Аввалроқ Андижонда ҳоким ўринбосари 15 минг доллар пора олган вақтда ушланганди. У 8 та савдо дўкони қуриш учун ер ажратиш ва тегишли ҳужжатларни юқори лавозимда ишловчи танишлари орқали расмийлаштириб бериш эвазига пул талаб қилган.
