Туркия президенти Ражаб Тоййиб Эрдўғон Мисрадаги Ғазо саммитида Исроил Бош вазири Биньямин Нетаньяхунинг қатнашиши мумкинлигини эшитиб, самолётни ортга қайтаришга буйруқ берди. Бу ҳақда Ülkе TV телеканали бош муҳаррири Ҳасан Ўзтурк жонли эфирда маълум қилди.
Маълум бўлишича, Эрдўғон Мисрга учиб келаётган пайтда Нетаньяху ҳам саммитда иштирок этиши мумкинлиги ҳақида маълумот олган. Шунда Туркия президенти бир нечта ҳамкор давлатларга хабар йўллаб, ҳақиқатдан шунда бўлса, самолётини ортга буриб, Туркияга қайтишини билдирган.
“Эрдўғоннинг самолёти қўнишга ҳозирланиб, шассилар туширилган эди. Аммо у яна осмонга кўтарилган”, деган Ўзтурк.
Лекин орадан бир оз ўтгач, Миср ҳукумати Нетаньяхунинг саммитда қатнашмаслигини билдирган. Шундан сўнг, Эрдоғоннинг самолёти Шарм эл-Шейхга қўнган. Расмийлар бу борада ҳали изоҳ бермаган.
INA агентлиги хабарига кўра, АҚШ президенти Дональд Трамп Нетаньяхуни саммитга жалб этмоқчи бўлган, аммо бир нечта давлатлар бунга қарши чиққан. Жумладан, Ироқ бош вазири агар Нетаньяху иштирок этса, саммитни тарк этишини билдирган. Миср расмийси Нетаньяхуга расмий таклиф юбормаган. Бироқ Трамп дипломатик алоқалар орқали уни жалб этишга ҳаракат қилган, дейилади хабарда.
