Сербия давлат инвестициялари вазири ва ҳукмрон Сербия тараққийпарвар партияси ижроия қўмитаси раиси Дарко Глишич Pink телеканалидаги эрталабки дастурнинг жонли эфирида инсультга учради. Бу ҳақда Сербиянинг “Вечерне новости” нашри хабар қилди.
Газета маълумотларига кўра, Глишич студияда аҳволи ёмонлашгани сабабли дастур фавқулодда тўхтатилган. Телевизион эфир кадрларида вазирнинг бошловчилар билан суҳбат пайтида гапи тушунарсиз бўлиб қолгани ва юзида сезиларли асимметрия пайдо бўлгани кўринади. Глишич зудлик билан Сербия клиник марказига етказилди. Нашр маълумотларига кўра, президент Александар Вучич воқеадан хабар топиши биланоқ касалхонага йўл олган.
Унинг ҳолати юзасидан соғлиқни сақлаш вазири Златибор Лончар баёнот берди.
“У [Глишич] телевидение эфирида аҳволи ёмонлашди, ҳушсиз ҳолда касалхонага олиб келинди. Ҳозир ташхис қўйилиб, даволаш бошланди. Барча чоралар кўрилади. Ҳаммамиз ташвишга тушганмиз, президент [Вучич] дастлабки дақиқаларданоқ шу ерда. Бу ҳолат барчамизни ларзага солди, аммо даволаш ва кўрилаётган чора-тадбирлар ижобий натижа беришига умид қиламиз. Ҳозирча фақат унинг аҳволи оғирлиги маълум. Муҳими, у инсультдан кейин ўз вақтида етказилди. Чунки дастлабки бир неча соат ҳал қилувчи аҳамиятга эга”, деб таъкидлади Лончар.
Газета Глишични Сербия раҳбарининг энг яқин ва ишончли шахсларидан бири деб таърифлайди.
