Ижтимоий тармоқларда 5 февраль куни Нукус шаҳрида жойлашган хусусий боғчада тарбиячи болаларга қўпол муносабатда бўлгани ва бошқа салбий ҳолатлар акс эттирилган видеолар тарқалди. Қорақалпоғистон Республикаси прокуратураси ҳолат юзасидан маълумот берди.
Видеокузатув камераларидан олинган тасвирларнинг бирида тарбиячи болани шиппак билан ургани, оёғи билан итариб юборгани акс этган. Аниқланишича, видеолавҳада акс этган ҳолат 2024 йил ноябрь ойида Нукус шаҳрида жойлашган хусусий мактабгача таълим ташкилоти тарбиячиси Р.Ш. ва ёрдамчи тарбиячи Д.С. томонидан содир этилган.
Мазкур ҳолат юзасидан Нукус шаҳар прокуратураси томонидан терговга қадар текширув ҳаракатлари олиб борилмоқда. Натижасига кўра қонуний қарор қабул қилиниши Қорақалпоғистон Республикаси прокуратураси томонидан назоратга олинди.
Шу каби ҳолат 2024 йилда Жиззах вилояти Ғаллаорол туманидаги боғчада ҳам кузатилганди. Тарбиячи болаларни шиппак билан калтаклаган. У ишдан олиниб, ҳолат юзасидан жиноят иши қўзғатилганди.
Тошкентдаги боғчада тарбиячининг қўпол ҳаракати оқибатида боланинг оёғи синганди.
