Европа иттифоқининг (ЕИ) ўнта мамлакати Россия газини импорт қилишни бутунлай тақиқлашга чақирмоқда. Ташаббусни ўз ичига олган ҳужжатни Литва, Латвия, Эстония, Дания, Чехия, Польша, Руминия, Швеция, Ирландия ва Финляндия имзолади. Бу ҳақда Bloomberg хабар берди.
Таклиф иккита ёндашувни назарда тутади: 2022 йилда қабул қилинган RePowerEU стратегияси доирасида импортни дарҳол тўлиқ тақиқлаш ёки босқичма-босқич қисқартириш. Ушбу стратегияга асосан Европа иттифоқи 2027 йилгача Россия газидан бутунлай воз кечиб, бошқа мамлакатлардан газ етказиб бериш ва қайта тикланадиган энергетикани ривожлантиришни режалаштирмоқда. Бироқ ҳужжат муаллифлари режани амалга оширишни тезлаштиришни талаб қилган.
Шу сабабли Европа иттифоқи февраль ойи охирида, Украинада уруш бошланганининг 3 йиллиги арафасида эълон қилиниши режалаштирилган Россияга қарши санкцияларнинг янги, 16-пакети устида ишламоқда.
ЕИ аллақачон Россия нефтини импорт қилишни тақиқлаган бўлса-да, айрим давлатларнинг Москвадан келадиган газга қарамлиги унга қарши санкцияларга тўсқинлик қилмоқда. Ҳар қандай чеклов чоралари Европа иттифоқига аъзо барча 27 давлатнинг бир овоздан маъқуллашини талаб қилади. Бироқ Венгрия бош вазири Виктор Орбан бунга қарши чиқиши эҳтимоли юқори.
Европа комиссияси келгуси ойда Россия энергиясидан босқичма-босқич воз кечиш бўйича батафсил режани тақдим этиши керак. Бироқ Европада совуқ об-ҳаво ва АҚШнинг Россия энергетикасига қарши янги санкциялари туфайли газ нархи аста-секин ошиши сабабли хавотирлар ортмоқда.
Европа иттифоқининг энергия ресурсларини диверсификация қилиш бўйича саъй-ҳаракатларига қарамай, уруш бошланганидан бери Россиядан нефть, газ ва кўмир импортининг умумий қиймати 200 миллиард евродан ошди (204 миллиард доллар).
