Европа бозорини йўқотган “Газпром” хориждаги йирик мижози ҳисобланган Хитой учун газга чегирмалар беришда давом этмоқда. Бу ҳақда ҳукумат ҳужжатларига таяниб Bloomberg хабар берди.
Маълум қилинишича, Хитой 2026 йилда “Сибир кучи” қувури орқали харид қиладиган газ Европа ва Туркияга етказиб бериладиган газдан 39 фоизга арзон бўлади. Пекин рус газининг минг куб метри учун 258 доллар тўлайди. Таққослаш учун Венгрия ва Туркия мижозлари билан тузилган контрактларда бу нарх 420 долларни ташкил этади. 2027 йилда эса Хитой учун нарх минг куб метр учун 223,9 долларгача пасаяди, чегирма эса 113 долларни ёки тахминан 33 фоизни ташкил этади.
Ҳукумат ҳужжатларига кўра, 2028 йилда Хитой газни минг куб метр учун 229,7 доллардан сотиб олади, бу “Газпром”нинг хориждаги бошқа мижозларига (327,4 доллар) нисбатан 30 фоизга арзонроқ. 2029 йилда эса газ 235,6 доллардан, яъни Европа ва Туркия нархларидан 27 фоизга арзонроққа берилади.
2025 йил Хитой “Газпром”дан 38 миллиард куб метр газ сотиб олди
Бу компания экспортининг деярли ярмига тенг. Умумий экспорт эса 1980 йиллар охиридан бери энг паст даражага яқинлашиб, тахминан 78 миллиард куб метрни ташкил этган. Европа бозорига экспорт 18 миллиард куб метрга тушиб кетди ва бу СССРнинг Австрия ва Италия билан биринчи газ шартномалари ишга туширилган 1973 йилдан бери энг паст кўрсаткич ҳисобланади.
2029 йилга бориб Россия Хитой бозорига газ етказиб беришни 52,5 миллиард куб метргача, яъни ҳозирги даражадан учдан бир қисмга ошириши кутилмоқда, деди Bloomberg манбалари.
2025-йилнинг сентябрь ойида Россия ҳукумати “Сибир кучи-2” қувури ўн йилликнинг охиригача ишга тушмаслигини прогноз қилди. Қувурнинг қуввати 50 миллиард куб метрни ташкил этиши керак. Бу эса Хитойга газ етказиб беришни икки баравардан кўпроққа ошириш имконини беради.
Путин сентябрь ойида Хитойга ташрифида “Сибир кучи”нинг иккинчи тармоғи бўйича Пекин билан келишувларга эришилганини маълум қилганди.
Ниҳоят, музокара олиб бораётган томонлар консенсусга эришди, деган у ва келажакда Хитой бозорига газ экспорти 100 миллиард куб метрга етишини қўшимча қилган.
“Газпром” ва Россия президентининг баёнотларини на Си Цзиньпин, на Хитой оммавий ахборот воситалари, ва на CNPC компанияси тасдиқлаган.
Маълумот ўрнида, Евроиттифоқ Россиядан суюлтирилган табиий газ импортини 2027 йил 1 январгача, қувур орқали етказиладиган газ импортини эса 2027 йил 30 сентябргача тўхтатади. Режа барча Европа иттифоқи давлатларининг бир овоздан розилигини талаб қилмайдиган тарзда ишлаб чиқилган.
