Самарқанднинг Ургут туманида эркак бошқа шахсни бир неча маротаба мих тиқиб ўлдиргани акс этган видео ижтимоий тармоқларда тарқалди. Видеодан тушунилишича, ўлган эркак йигитнинг онаси ва синглисини ҳақорат қилган.
Бош прокуратура матбуот котиби Ҳаёт Шамсутдиновнинг «Дарё» сўровига асосан маълум қилишича, воқеа 5 июнь куни соат 18:30 ларда Ургут туманида юз берган. Шу туманда яшовчи 26 ёшли С.Б. маҳалла марказида жойлашган тўйхона олдида 50 ёшли таниши О.Ў.билан спиртли ичимлик исътемол қилиб, маст ҳолатда ўзаро жанжаллашиб қолган.
Сўнг йигит шу атрофда жойлашган хўжалик моллари сотиш учун мўлжалланган савдо дўконига кириб, 15 сантиметр узунликдаги ўткир тиғли михни олиб чиқиб, Ў.О.нинг ўнг кўкрак қисмига бир маротаба санчиб, у ерга йиқилганидан сўнг оёқ ва қўллари билан бош соҳасига зарбалар бериб, унга кўплаб оғир тан жароҳатлари етказган.
Оқибатда Ў.О. Ургут туман тиббиёт бирлашмасининг жонлантириш бўлимида вафот этган. Марҳумнинг ўлим сабабларини аниқлаш мақсадида суд-тиббий экспертизаси тайинланган.
Ҳолат юзасидан 5 июнда туман прокуратураси томонидан С.Б.га нисбатан Жиноят кодексининг 97-моддаси 1-қисми (қасддан одам ўлдириш) билан жиноят иши қўзғатилиб, дастлабки тергов ҳаракатлари олиб борилмоқда.
Гумонланувчи С.Б. процессуал тартибда ушланган.
Бундан аввал Фарғонада танишини 21 марта пичоқ уриб ўлдирган эркак 19 йилга озодликдан маҳрум этилгани ҳақида хабар берилган эди.Мавзуга доир:
