Ижтимоий тармоқларда Наманган шаҳридаги хонадонлардан бирида рўй берган ёнғин акс этган видеолар тарқалди.
«Дарё» мухбирининг аниқлик киритишича, ҳодиса 8 февраль куни соат 19:57 атрофида рўй берган. Наманган шаҳрининг «Даштбоғ» маҳалласи, Абдулла Тўқаев кўчасидаги хонадонлардан бирида содир бўлган. Уч дақиқадан сўнг воқеа жойига шаҳар ёнғин-қутқарув қисми шахсий таркиби етиб борган.
Вилоят ФВБ матбуот хизматига кўра, ҳодиса оқибатида уйнинг шифт ва том қисмидан 190 квадрат метр жойи ҳамда жиҳозлар, уй эгаларига тегишли бўлган ҳужжатлар ёниб кетган. Ёнғин қўшни хонадонга ҳам ўтган ва бу ерда 60 квадрат метр майдонни аланга қоплаган.
Ёнғин бир соатдан ошиқ вақтдан сўнг, соат 21:15 атрофида ўчирилган. Қурбонлар ва жабрланганлар бўлмаган.
Ҳозирда ёнғиннинг келиб чиқиш сабаблари ва кўрилган зарар миқдори аниқланмоқда. Ҳодиса юзасидан терговга қадар суриштирув ишлари олиб борилмоқда.
