Жанубий Корея Ўзбекистонда эпидемиологик вазият барқарорлашганини инобатга олиб, уни коронавирус бўйича қизил ҳудуддаги давлатлар рўйхатидан чиқарди.
Ташқи миграция агентлиги матбуот хизматининг хабар беришича, эндиликда шартномаси мавжуд ҳамда виза тасдиқномаларининг амал қилиш муддати тугамаган фуқароларни Жанубий Кореяга ташкилий тарзда жўнатиш бўйича мазкур давлатнинг тегишли идоралари билан музокаралар олиб борилмоқда.
«Бугунги кунда фуқароларни ташкилий тарзда жўнатишнинг аниқ саналари номаълумлиги сабабли шартномаси келган ва виза тасдиқномалари мавжуд фуқароларнинг Ташқи меҳнат миграцияси агентлигига тақдим қилиниши лозим бўлган ҳужжатларни тайёрлаб қўйишлари тавсия қилинади», — дейилади хабарда.
Жанубий Кореяга фуқароларни ташкилий тарзда жўнатиш бўйича янгилик бўлган тақдирда, Ташқи меҳнат миграцияси агентлигининг расмий саҳифалари орқали эълон қилиб борилиши билдирилган.
Эслатиб ўтамиз, Ташқи меҳнат миграцияси агентлиги матбуот котиби Ортиқхўжа Норов пандемия билан боғлиқ Ўзбекистондаги вазият кореяликлар томонидан мунтазам кузатиб борилаётганини айтганди. Мавзуга доир:
