Тошкент шаҳрида 22 февраль, душанба куни ҳаво ҳарорати +23,4 даражагача кўтарилиб, метеорологик кузатувларнинг 22 февраль тарихидаги 1895 йилда ўрнатилган рекордни янгилади. Бу ҳақда, «Ўзгидромет» марказига асосланиб, UZ24 хабар бермоқда.
22 февраль тарихидаги аввалги рекорд бундан 121 йил аввал — 1895 йилда ўрнатилган бўлиб, ўшанда ҳаво ҳарорати 22,9 даражагача кўтарилган. Қайд этиш жоиз, 1895 йил февралининг иккинчи ярми илиқ келган. «Ўзгидромет» маълумотларига кўра, ўша йили 21 февраль куни ҳаво ҳарорати +23,8 даражагача кўтарилган.
Аввалроқ бир қатор сайтларда, метеорологик кузатувларнинг фақат 22 февралдаги маълумотларига асосланган ҳолда, Тошкент шаҳрида сўнгги 110 йилдаги энг илиқ февраль кузатилгани ҳақида ахборот пайдо бўлганди. Таъкидлаш жоиз, рекорд илиқ ҳаво фақат бир кун — 22 февралга алоқадор ва у 110 эмас, 121 йиллик рекорддир.
2016 йилнинг январь—февраль ойлари фавқулодда илиқ келди. Бунгача ҳам январь ва февраль ойларининг алоҳида кунларида Тошкент, Термиз, Самарқанд ва Нукусда ҳаво ҳароратининг илиқлиги бўйича янги рекордлар ўрнатилган эди.
