Braziliyada kuzatilayotgan sovuq ob-havo savdogarlar orasida joriy va kelgusi yilgi hosil bo‘yicha xavotirlarni kuchaytirdi. Shu bois arabika qahvasining narxi iyun oyidan beri rekord darajada ko‘tarilmoqda. Bu haqda mahalliy nashrlarga tayanib, RBK xabar berdi.
Qahva narxlari 2024-yilda qariyb 70 foizga oshgan bo‘lsa, 2025-yilning shu davrigacha yana 8 foizga ko‘tarilish qayd etilgan. Ma’lumotlarga ko‘ra, 2025-yil 19-avgust kuni arabika qahvasining dekabr fyucherslari 3,32 foizga qimmatlashib, bir kilogram qahva 7,63 dollarni tashkil qilgan.
Narxlar 6 kundan buyon uzluksiz oshib kelmoqda: 13-avgustdan boshlab qahva narxi 12,62 foizga ko‘tarilgan. Bu, 2025-yil aprelidan buyon kuzatilgan eng uzoq o‘sish bo‘ldi. McDougall Global View tahlilchisi Maykl Makdugallning ta’kidlashicha, gap nafaqat joriy hosil haqida, balki 2026-yilgi hosilning ham kamayish ehtimoli haqida bormoqda.
“Sovuq erta gullashni kuchaytirib, daraxtlarga ortiqcha bosim o‘tkazmoqda”, dedi u.
“Sucden Financial” kompaniyasi brokeri Garri Xovard esa so‘nggi kunlardagi narxlarning oshishini Braziliyadan eksportning kutilganidan sekinroq sur’atlarda o‘sishi bilan izohlamoqda. Unga ko‘ra, Sol de Minas va Kerrado mintaqalarida kuzatilgan sovuq ham narxlarga tasir o‘tkazgan.
Shuningdek, Vyetnamda ham qahva ta’minotiga xavf soluvchi muammolar yuzaga kelmoqda. Mamlakatdagi asosiy yetishtirish hududlaridan birida qurg‘oqchilik kuzatilgan bo‘lsa, yig‘im-terim mavsumi boshlanishida kuchli yomg‘ir yog‘gan.
Braziliya dunyodagi eng yirik qahva yetishtiruvchisi va eksportchisi sanaladi. 2025/26-yil mavsumida mamlakatda qariyb 65 million qop (taxminan 3,9 mln tonna) qahva yetishtirilishi kutilmoqda. Hosilning katta qismi arabika, qolgan qismi robusta turiga to‘g‘ri keladi.
Eksport bo‘yicha 2024-yil Braziliya uchun rekord bo‘ldi — yil yakunida 50,4 million qop (taxminan 3,0 mln tonna) qahva sotilgan. 2024/25-yilda eksport 44,25 million qop (2,7 mln tonna) atrofida bo‘lgan, 2025/26-yilda esa 41–42 million qop (≈ 2,5 mln tonna) bo‘lishi taxmin qilinmoqda. Import haqida gap ketganda, Braziliya ichki ehtiyojini asosan o‘zi ta’minlaydi. Faqat oz miqdorda qovurilgan qahva Shveytsariya, Fransiya va Italiyadan olib kiriladi.
Shu bilan bir qatorda Braziliya O‘zbekistonga ham qahva yetkazib beradi. Xususan, 2025-yilning yanvar-iyun oylarida O‘zbekiston 36 ta xorijiy davlatlardan qiymati 3,9 million dollariga teng bo‘lgan 431 tonna kofe import qilgan. Ularning ichida Braziliya 81 tonna bilan ikkinchi o‘rinda turibdi.
Izoh (0)