Samarqand viloyati Toyloq tumanida Zarafshon daryosi o‘zanidan noqonuniy ravishda qum-shag‘al qazib olinayotgani aniqlandi. Bu haqda Ekologiya va iqlim o‘zgarishi milliy qo‘mitasi xabar berdi.
Ma’lum qilinishicha, Ekopolitsiyaning Zarafshon daryosi va uning muhofaza hududlarini nazorat qilish bo‘limi xodimlari tomonidan navbatdagi nazorat-reyd tadbiri o‘tkazilgan.
Reyd davomida moratoriy joriy qilingan daryoning o‘zan qismida bir guruh fuqarolar tomonidan noqonuniy qazish ishlari olib borilgani aniqlangan. Holat tungi soat 01:30 lar atrofida qayd etilgan.
Qayd etilishicha, davlat raqamisiz ekskavator yordamida qum-shag‘al aralashmasi yuk avtomashinalariga yuklanayotgan bo‘lgan.
Avvalroq Qashqadaryodagi Muborak gazni qayta ishlash zavodi faoliyati davomida ekologik qonunbuzilishlarga yo‘l qo‘ygani aniqlanib, korxonaga 10 milliard 834 million so‘m miqdorida qo‘shimcha kompensatsiya belgilangandi.
O‘zbekistonda 2026-yil avgustdan ekologiya, atrof-muhitni muhofaza qilish va tabiatdan foydalanish sohasidagi huquqbuzarliklar uchun yuridik shaxslarga nisbatan moliyaviy sanksiyalar joriy etiladi.
Yangi qonunga ko‘ra, daryo o‘zanlarini tozalash va qirg‘oqlarni mustahkamlash tartibini buzgan, suvlarni ifloslantirgan yoki hududidagi daraxtlarni himoya qilish choralarini ko‘rmagan yuridik shaxslarga atrof-muhitga yetkazilgan zarar miqdoridan bir necha baravar yuqori moliyaviy jarimalar qo‘llanadi.
