Жанубий Кореянинг қамоқда сақланаётган собиқ президенти Юн Сок Ёлнинг рафиқаси Ким Гон Хи 12 август куни акциялар нархини сунъий ошириш ва пора олиш каби бир қатор айбловлар билан ҳибсга олинди. Бу ҳақда BBC хабар берди.
Маълум қилинишича, Сеул судида 4 соат давом этган тингловда собиқ биринчи хоним барча айбловларни рад этган. Бироқ суд унга нисбатан далилларни йўқ қилиш хавфи мавжудлигини билдирган ҳолда қамоққа олиш ордерини чиқарган.
Жанубий Кореяда собиқ президентларнинг ҳибсга олиниши ёки суд қилиниши учраб турадиган ҳолат саналади. Аммо мамлакат тарихида илк бор собиқ президент ҳам, унинг турмуш ўртоғи ҳам бир вақтда қамоқда сақланмоқда. Собиқ президент 2024 йил январь ойида мамлакатда ҳарбий ҳолат эълон қилиши ортидан ҳибсга олинган эди.
Прокуратура маълумотларига кўра, 52 ёшли Ким Гон Хи BMW’нинг Жанубий Кореядаги расмий дилери “Deutsch Motors” акциялари нархини манипуляция қилишда қатнашиб, 800 миллион вон (тахминан 578 минг АҚШ доллари) даромад олган. Бу ҳодисалар турмуш ўртоғининг президент бўлишидан олдин юз бергани айтилса-да, Ёлнинг бутун президентлик даврида шубҳа уйғотиб келган.
Шунингдек, Гон Хи черковдан бизнес имтиёзлари эвазига 2 та Chanel сумкаси ва олмос маржонни пора сифатида қабул қилганликда гумон қилинмоқда. Бундан ташқари, у 2022 йилги қўшимча парламент сайловлари ҳамда 2024 йилги умумий сайловларда номзодлар танловига аралашганликда ҳам айбланмоқда. Суд тингловига қора костюм ва қора юбкада келган Ким Гон Хи журналистларга шундай деди:
“Ҳеч қандай аҳамиятга эга бўлмаган инсон бўлсам-да, муаммо келтириб чиқарганим учун чин дилдан узр сўрайман”.
Юн Сок Ёл ўзининг президентлик даврида парламентдаги мухолифат ташаббуси билан 3 марта унинг рафиқасига қарши махсус тергов ўтказиш тўғрисидаги қонун лойиҳаларини вето қилган эди. Сўнгги вето 2024 йил ноябрь ойида ҳарбий ҳолат эълон қилинишидан бир ҳафта олдин киритилган. 2025 йил июнь ойида Юннинг сиёсий рақиби Ли Же Мёнг Жанубий Корея президенти бўлгач, Ким Гон Хи ва собиқ президентнинг ишини ўрганиш учун махсус прокурор тайинланган.
Изоҳ (0)