Беларусь президенти Александр Лукашенко 8 август куни 1994 йилдан бери эгаллаб келаётган лавозимига яна қайта номзод бўлмаслигини маълум қилди. Бу ҳақда Anadolu хабар берди.
Беларусь раҳбари 8 август куни Тиме журналига махсус интервью берган. Маълум қилинишича, у 2020 йилги сайловда ҳам иштирок этишни хоҳламаган эди.
“Ростини айтсам, 2020 йилги сайловда ҳам кетишга тайёр эдим. Лекин одамлар кетадиган бўлсам бу хоинлик бўлишини айтди. Шунинг учун қолишга мажбур бўлдим”, деди Лукашенко.
У, шунингдек, ўғли Николай Лукашенко ҳақида ҳам фикр билдирган:
“Йўқ, у менинг ўринбосарим эмас. Бу ҳақда сўрашингизни билар эдим. Ўзингиз ундан сўранг. Бу савол уни хафа қилади. У ҳам мени қўллаб-қувватлайди, лекин айрим масалаларда унинг қарашлари бир оз бошқача”, деган Беларусь раҳбари.
Президент ўз ўрнига ким келишидан бехабарлигини, аммо мамлакатни тинч ва эволюцион йўл билан бошқарадиган, “ақлли ва нормал инсон” истаётганини таъкидламоқда.
“Фақат у мавжуд ҳолат ва сиёсатни бузмасин, бор тузум асосида аста-секин мамлакатни ривожлантирсин. Инқилоблар, ўзгаришлар эмас, босқичма-босқич тараққиёт керак”, деган у.
Беларусь раҳбари интервьюда Украина масласига ҳам тўхталиб ўтган. Унинг фикрича, Россия Украинада мағлуб бўлиши мумкин эмас, чунки у дунёдаги энг йирик ядровий қуролларга эга. У Кремль жуда кескин ҳолатда ядровий қуролдан фойдаланиши мумкинлигига ишора қилиб, бундай мағлубият ҳамма учун жуда қимматга тушишини айтган.
Лукашенко, шунингдек, Беларусь Россия ва Украина президентлари ўртасида музокаралар ўтказишга тайёрлигини маълум қилган.
“Донолик билан олиб бориладиган музокаралар келажакдаги урушларнинг олдини олади”, деган у.
Унга кўра, Россия президенти Владимир Путин АҚШ президенти Дональд Трамп билан Минскда учрашишга қарши эмас ва Трамп ҳам бундай учрашувдан мамнун бўлади. Лукашенко ўзи ҳам АҚШ раҳбари билан алоҳида учрашувдан манфаатдор эканини билдирган.
Изоҳ (0)