Belarus prezidenti Aleksandr Lukashenko 8-avgust kuni 1994-yildan beri egallab kelayotgan lavozimiga yana qayta nomzod bo‘lmasligini ma’lum qildi. Bu haqda Anadolu xabar berdi.
Belarus rahbari 8-avgust kuni Time jurnaliga maxsus intervyu bergan. Ma’lum qilinishicha, u 2020-yilgi saylovda ham ishtirok etishni xohlamagan edi.
“Rostini aytsam, 2020-yilgi saylovda ham ketishga tayyor edim. Lekin odamlar ketadigan bo‘lsam bu xoinlik bo‘lishini aytdi. Shuning uchun qolishga majbur bo‘ldim”, dedi Lukashenko.
U, shuningdek, o‘g‘li Nikolay Lukashenko haqida ham fikr bildirgan:
“Yo‘q, u mening o‘rinbosarim emas. Bu haqda so‘rashingizni bilar edim. O‘zingiz undan so‘rang. Bu savol uni xafa qiladi. U ham meni qo‘llab-quvvatlaydi, lekin ayrim masalalarda uning qarashlari biroz boshqacha”, degan Belarus rahbari.
Prezident o‘z o‘rniga kim kelishidan bexabarligini, ammo mamlakatni tinch va evolyutsion yo‘l bilan boshqaradigan, “aqlli va normal inson” istayotganini ta’kidlamoqda.
“Faqat u mavjud holat va siyosatni buzmasin, bor tuzum asosida asta-sekin mamlakatni rivojlantirsin. Inqiloblar, o‘zgarishlar emas, bosqichma-bosqich taraqqiyot kerak”, degan u.
Belarus rahbari intervyuda Ukraina maslasiga ham to‘xtalib o‘tgan. Uning fikricha, Rossiya Ukrainada mag‘lub bo‘lishi mumkin emas, chunki u dunyodagi eng yirik yadroviy qurollarga ega. U Kreml juda keskin holatda yadroviy quroldan foydalanishi mumkinligiga ishora qilib, bunday mag‘lubiyat hamma uchun juda qimmatga tushishini aytgan.
Lukashenko, shuningdek, Belarus Rossiya va Ukraina prezidentlari o‘rtasida muzokaralar o‘tkazishga tayyorligini ma’lum qilgan.
“Donolik bilan olib boriladigan muzokaralar kelajakdagi urushlarning oldini oladi”, degan u.
Unga ko‘ra, Rossiya prezidenti Vladimir Putin AQSH prezidenti Donald Tramp bilan Minskda uchrashishga qarshi emas va Tramp ham bunday uchrashuvdan mamnun bo‘ladi. Lukashenko o‘zi ham AQSH rahbari bilan alohida uchrashuvdan manfaatdor ekanini bildirgan.
Izoh (0)