Ўзбекистонда ҳар йили август ойининг иккинчи якшанбаси Қурилиш соҳаси ходимлари куни сифатида нишонланади. Бугун, 9 август куни президент қурувчиларни касб байрами билан табриклади.
Табрикда соҳа ривожига оид бир қатор фактлар келтирилди. Маълум қилинишича, 2016 йилда мамлакатда қурилиш ишлари ҳажми 30 триллион сўм бўлган. 2024 йилда бу кўрсаткич 234 триллион сўмга етган.
Ўтган йили Ўзбекистонда 40,5 миллион квадрат метр бино ва иншоот қурилди, жорий йилда бу рақам 45 миллион квадрат метрдан ошиши кутилмоқда.
2024 йилда 100 мингдан ортиқ хонадонга эга 2 044 та кўп қаватли уй фойдаланишга топширилди. Аҳоли жон бошига тўғри келадиган уй-жой майдони эса 2020 йилдаги 16 квадрат метрдан 19 квадрат метрга етди.
Ҳозирда 56 та ҳудуддаги “Янги Ўзбекистон” массивларида қурилиш ишлари давом этмоқда.
Жорий йилда 135 минг хонадон топширилиши режалаштирилган. 2030 йилгача массивлар сони 100 тага етказилиб, жами 250 минг хонадон қурилиши кўзда тутилган.
Шунингдек, “Янги Тошкент” лойиҳаси доирасида 20 минг гектар майдонда 2 миллион аҳоли учун замонавий инфратузилма барпо этилмоқда. Биринчи босқичда Миллий кутубхона, Янги Ўзбекистон университети, Алишер Навоий номидаги халқаро илмий-тадқиқот маркази ва музейи, ихтисослаштирилган мактаб, мақом маркази ҳамда Низомий номидаги Тошкент давлат педагогика университети қурилмоқда.
Президент қурилиш жараёнларининг барча босқичларида жамоатчилик фикри ва назоратини таъминлаш муҳимлигини таъкидлаган.
Давлат раҳбари барча қурувчиларни касб байрами билан қутлаб, янги ютуқ ва омадлар тилаган.
Изоҳ (0)