Вьетнамда АҚШ президенти Дональд Трамп оиласи бизнесига тегишли гольф клуби қурилади. Фермерларга 3200 доллар ва гуруч захираси эвазига ерларини бўшатиш таклиф қилинди. Бу ҳақда Reuters хабар берди.
Қурилиш ишлари сентябрь ойида бошланиши мумкин. Минглаб қишлоқ аҳолиси ўн йиллардан бери тирикчилик манбаси бўлган ерлардан воз кечишга мажбур бўлади. Гольф клуби — Трамп оиласи ва Вьетнам ҳукумати ўртасидаги илк қўшма лойиҳа бўлиб, Вашингтон билан муҳим савдо музокаралари пайтида амалга оширилмоқда.
Гольф майдони учун ажратилган 990 гектар ҳудуд банан, лонган ва бошқа мевалар етиштириладиган боғларни ўз ичига олади.
Бутун қишлоқ лойиҳадан ташвишда, чунки у биздан ерни тортиб олиб, бизни ишсиз қолдиради, дейди 50 ёшли Хёнг исмли фермер.
Лойиҳани Вьетнамнинг Kinhbas City компанияси амалга оширади, аммо бренд ҳуқуқи учун Тrump Organization’га 5 миллион доллар тўлайди. Клуб қуриб битказилгач, уни Трампнинг оилавий бизнеси бошқаради. Аммо инвестициялар ва фермерларга компенсация тўлашда иштирок этмайди.
Расмийларга кўра, компенсация ер майдони ва жойлашувига қараб белгиланади. Айрим фермерларга 1 квадрат метр учун 12–30 доллар, илдизи билан суғурилган ўсимликлар ва бир неча ойлик гуруч учун қўшимча тўлов таклиф этилган. Вьетнамда қишлоқ хўжалиги ерлари давлат тасарруфида бўлиб, фермерлар уларни узоқ муддатли фойдаланиш ҳуқуқи билан ижарага олади.
Изоҳ (0)