Суринам давлати ҳудудида ниҳоятда олтинга бой кон топилди. Мамлакат сўнгги пайтларда аниқланган нефть ва бошқа қимматбаҳо ресурслар туфайли иқтисодий ўсишни бошдан кечирмоқда. Бу ҳақда Earth.com хабар берди.
Геологик изланишлар давомида Мариа Гералда ҳудудида битта қудуқ қазилган. Натижада 22,5 метр узунликдаги қатламда ҳар бир тонна жинс таркибида 11,88 грамм олтин борлиги аниқланган. Бундай кўлам ва зичликдаги конлар жуда камёб ҳисобланади.
Саноат мутахассисларига кўра, бир тонна жинс таркибида 10 грамм ва ундан ортиқ олтин бўлса, бундай кон бой кон ҳисобланади. Одатда бу кўрсаткич 1–10 г/т атрофида бўлади. Мариа Гералда ҳудудида эса нафақат олтин миқдори юқори, балки томирнинг кенглиги ҳам катта. Амалиётда кўплаб конлар 2 г/т дан ортиқ олтин бермайди. Шунинг учун деярли 12 г/т кўрсаткичга эга кон лойиҳа иқтисодиётини тубдан ўзгартиради.
Суринам учун бу топилма муҳим, аммо мамлакат иқтисодиётига кескин таъсир қилмайди. Чунки сўнгги йилларда тоғ-кон ва нефть саноати тез ривожланиб, ялпи ички маҳсулотнинг 60 фоизини ва экспорт даромадининг 90 фоизини таъминлаб келмоқда.
Бироқ йилига 4 000 миллиметрдан ортиқ ёғин ёғадиган Суринам ўрмонларида кон қазиш ишлари мураккаб бўлиб, қатъий экологик назорат талаб этилади. Ҳукумат эса ривожланиш билан бирга табиат хилма-хиллигини ва маҳаллий халқларнинг ҳуқуқларини асрашга қаратилган меъёрларни босқичма-босқич ривожлантирмоқда.
Изоҳ (0)