Бугун Жиноят ишлари бўйича Учтепа туман судида жамоатчилик орасида Мубашшир Аҳмад номи билан танилган Алишер Турсунов иши бўйича суд муҳокамаси бошланди. Бу ҳақда суд мажлисида қатнашган “Дарё” журналисти хабар берди.
Суд мажлиси аввалида судланувчининг адвокати судья Бобур Раҳимовдан суд жараёнида ОАВ вакиллари иштирокига рухсат берилишини сўраб илтимоснома киритди.
Мубашшир Аҳмад эса ОАВ вакилларидан суд жараёнини ёритишда бошқача талқинга берилмасликни, холис ва ҳаққоний ахборот тарқатишларини илтимос қилди. Бироқ мажлисга раислик қилувчи судья ОАВ вакилларига фото, видео ва аудиоматериаллар олишни тақиқлади. Аммо суд очиқлиги боис, шунчаки кузатувчи сифатида ўтиришлари, шунингдек, ахборотларни қоғозга ёзиб олиш ҳуқуқлари борлигини эслатди.
“Судланувчи айбсизлик презумпсиясига асосан суднинг қонуний кучга кирган ҳукми билан айби аниқланмагунча айбсиз ҳисобланади. Шу боис журналистлар судланувчининг айбли ёки айбсизлиги юзасидан турли тахмин, шубҳа-гумонларга берилмасликлари, шошма-шошарлик билан хулоса чиқармасликлари керак. Бунинг учун жавобгарлик борлигини эслатаман ва огоҳлантираман”, деди раислик этувчи судья ОАВ вакилларига мурожаат қилар экан.
Судда сўз олган давлат айбловчиси тергов органи Мубашшир Аҳмадни Жиноят кодексининг 156-моддаси (миллий, ирқий, этник ёки диний адоват қўзғатиш) 2-қисми, 244-1-моддаси (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) 3-қисми “г” банди ва 244-3-моддаси (диний мазмундаги материалларни қонунга хилоф равишда тайёрлаш, сақлаш, олиб кириш ёки тарқатиш)да айблаётганини маълум қилиб, айблов хулосасини ўқиб эшиттирди.
2025 йилнинг 12 май куни Мубашшир Аҳмад Истанбулда қўлга олингани хабар берилган эди. 13 май куни Ички ишлар вазирлиги у Ўзбекистонга депортация қилинганини маълум қилди. Вазирлик берган ахборотга кўра, халқаро қидирувга эълон қилинган Алишер Турсунов 8 май куни Туркияда ҳуқуқ-тартибот идоралари томонидан қўлга олиниб, 10 май куни Ўзбекистонга депортация қилинган. Унга нисбатан қамоққа олиш эҳтиёт чораси қўлланилган.
Изоҳ (0)